Profesionais e concellos da nosa terra amosan as vantaxes administrativas e as posibilidades de negocio da senda smart
venres, 9 de maio do 2014
- A presidenta da Federación Galega de Empresarios Novos, Carmen José López, o presidente de INEO e CONETIC, Jorge Cebreiros, e o secretario xeral de Eixo Atlántico, Xoán Vázquez Mao
Hoxe celebrouse da
man de INEO a xornada As
TIC e a eAdministración no marco das Smart Cities, en
palabras da asociación empresarial unha boa oportunidade para que
administracións locais, empresas e axentes tecnolóxicos e
económicos intercambiasen as súas experiencias no ámbito da
sustentabilidade nas institucións públicas, identificando as
principais necesidades dos concellos e os nichos de negocio
existentes para as empresas do sector. A xornada veu da man de INEO e
a Federación Nacional de Empresas TIC, CONETIC. No seu transcurso,
INEO presentou as as tecnoloxías desenvolvidas por algunhas das súas
empresas para mellorar a eficiencia e o aforro na administración,
“que son claros exemplos dos eidos onde se poden emprender
iniciativas empresariais frutíferas”, sinalou a asociación.
No evento, enmarcado
dentro do proxecto eTICs (do que INEO é parte activa, e que ten como
obxectivo fomentar o emprendemento e a apertura de novas liñas de
negocio no ámbito da sustentabilidade), participaron representantes
de catro concellos galegos que están a levar a cabo, neste intre,
iniciativas de Smart City asesoradas por INEO. Compartiron
mesa con profesionais de cinco das empresas integrantes da
asociación, e xuntos (concellos e empresas) puxeron en común as
súas experiencias no desenvolvemento de proxectos para contornas
intelixentes.
Os primeiros deron a
coñecer as necesidades das súas concellos no ámbito da
sustentabilidade da administración pública, e os segundos
presentaron as solucións existentes en áreas como a participación
cidadá, a mobilización de servizos públicos, a conectividade ou a
seguridade.
O evento, que conta co
apoio do Programa Empregaverde da Fundación Biodiversidade, foi
presentado polo presidente de INEO e CONETIC, Jorge Cebreiros, e
contou ademais coa participación do Eixo Atlántico, da Federación
de Empresarios Novos de Galicia, do Colexio Oficial de Enxeñeiros de
Telecomunicación de Galicia e da Escola de Enxeñaría de
Telecomunicación.
Cebreiros comezou a súa
presentación afirmando que “as TIC proporcionan oportunidades para
investimentos de alta rendibilidade social e empresarial en solucións
intelixentes que transformarán a administración, o transporte, a
subministración enerxética, a atención sanitaria e o lecer, entre
outros ámbitos”, e engadiu que para que poidan aproveitarse é
necesario “escoitar a aqueles que teñen as necesidades, porque
resolver esas necesidades é precisamente a senda que nos vai levar a
cumprir as expectativas que se ten de nós”. Asemade, dixo que son
os profesionais galegos do eido tecnolóxico-dixital os que deben
recoller as necesidades que se lles expoñen e convertelas en
solucións comercializábeis, desenvolvidas en Galicia pero vendidas
ao mundo”. Na súa opinión, o potencial galego neste senso é
enorme, e a nosa terra é “un excelente eido de probas para a
tecnoloxía”, e isto malia as dificultades que achega o
espallamento demográfico e a orografía da nosa paisaxe, cousas que
se somos quen de superar, entón estamos en disposición de achegar
solucións, tecnoloxías e innovación para calquera parte do mundo,
engadiu.
Concluíu a súa
intervención convidando a todos asistentes a “saír hoxe de aquí
cun xermolo de idea da solución que ides pór en mercado mañá”.
Durante a xornada
desenvolvéronse tamén varias actividades de networking entre
administracións, empresas TIC e axentes tecnolóxicos e económicos
coa finalidade de identificar necesidades e nichos de oportunidade,
xerando sinerxías entre todos os axentes implicados. Realizáronse
dúas mesas coloquio. A primeira, Necesidades da Administración
Local nas Smart Cities, moderada pola directora xeral de INEO,
Lucía Gregorio, estivo integrada por representantes dos concellos de
Tomiño, Lalín, Monforte de Lemos e a eurocidade Chaves-Verín, que
participaron en proxectos smart liderados pola asociación
empresarial TIC, e serviu para definir cales son as principais
necesidades e demandas comúns aos concellos galegos neste ámbito,
como a integración e posta en marcha de ferramentas de tramitación
electrónica ou facer a eAdministración máis próxima ao cidadán.
Na segunda mesa,
Tecnoloxías existentes para a e-Administración e Participación
Pública, moderada pola directora da Escola de Enxeñaría de
Telecomunicación de Vigo, Edita de Lorenzo, participaron cinco
empresas socias de INEO con experiencia na materia adquirida grazas á
súa participación en proxectos smart en colaboración con
administracións locais. Estas empresas amosaron distintas soluciones
TIC que poden ofrecen grandes posibilidades de mellora da eficiencia
e sustentabilidade aos concellos galegos.