Promover as firmas TIC no mundo, entre os grandes obxectivos de Galicia Exporta
luns, 22 de xullo do 2019
O
programa Galicia Exporta Organismos Intermedios, que impulsa e
favorece a presenza no mundo das nosas empresas (os plans que
xestionan 35 agrupacións empresariais da nosa terra) prevé a
participación de 479 firmas en actividades a realizar en tres ducias
de países. O
importe total das axudas mobilizadas por este programa do IGAPE é de
1,88 millóns de euros, o que supón un incremento do 25% con
respecto ao ano anterior. As Tecnoloxías da Información e a
Comunicación, xunto co audiovisual, o naval, alimentación, o téxtil
e o motor, serán os eidos prioritarios. A axenda de accións inclúe
misións comerciais ou alianzas de cooperación para o estudo de
mercados. Serán preto de 200 accións.
Esta
liña de axudas, co-financiada polo Fondo Europeo de Desenvolvemento
Rexional (FEDER), ten como obxectivo apoiar os plans de
internacionalización xestionados polos agrupacións empresariais,
consellos reguladores de denominacións de orixe, clústeres e
centros tecnolóxicos para “facilitar ou consolidar a
internacionalización das empresas que comparten intereses en
determinados mercados, mediante a cooperación e o aproveitamento de
sinerxías”.
Os
plans de internacionalización desenvolveranse en 36 países,
incrementándose nun 8% os que se levarán a cabo en destinos non
europeos. Destacan, en primeiro lugar, os Estados Unidos como mercado
obxectivo, representando o 13% das accións aprobadas. En segundo
lugar, atópase o continente asiático, xa que case o 12% das accións
dirixiranse a el, destacando países como China, Singapur e Xapón.
Estas accións increméntase nun 30% respecto da convocatoria
anterior.
O
deseño desta liña de axudas permite apoiar misións comerciais
directas e inversas, a participación en feiras ou eventos
expositivos, a contratación de bases de datos de intelixencia
competitiva, a xestión de tramitación de acordos e licitacións
internacionais e as accións cooperativas para a prospección de
mercados, entre outras cousas.