Publican a listaxe de xogos dispoñibles en PlayStation Plus en abril

Os subscritores de PlayStation Plus contarán con novos xogos dispoñibles sen custo adicional para as súas consolas de Sony a partires do vindeiro 8 de abril, e parece que estes xogos manteñen a súa tónica habitual de perfil baixo, en contraste coa forza que ten nos últimos meses a oferta equivalente de Microsoft. Desta volta os xogadores de PlayStation 4 recibirán o shooter en primeira persoa Tower of Gun e o curioso xogo de quebracabezas de plataformas Never Alone (Kisima Ingitchuna), destacando o primeiro destes títulos por poder xogarse tamén na PlayStation 3, como Aaru’s Awakening, outro dos títulos independentes e pouco coñecidos que chegarán este mes.
O único xogo realmente importante de abril sería Dishonored, un título para PS3 que realmente foi moi ben acollido polo público e pola crítica (recibiu un 89 sobre 100 en Metacritic), aínda que tamén é salientable que os usuarios de PS Vita poderan facerse con Killzone Mercenary e MonsterBag, o que agradará aos seareiros da franquía Killzone que conten cunha das consolas portátiles de Sony.