Pulo ao emprendemento en Vigo, da man das dúas principais organizacións empresariais
mércores, 21 de marzo do 2012
A Delegada do Consorcio da
Zona Franca de Vigo, Teresa Pedrosa, comandante dunha entidade que ten como
obxectivo primordial fomentar a innovación e o tecido produtivo na cidade
olívica, vén de asinar un acordo de colaboración coa Asociación de Jóvenes Empresarios
de Galicia, outra
entidade con delegación en Vigo, interesada na promoción e defensa dos
intereses profesionais dos empresarios e emprendedores asociados, por certo, que
suman máis de 200 a día de hoxe.
O acordo asinado
entre ambas partes, abre unha liña de colaboración para apoiar a posta en
marcha de proxectos empresariais que desenvolvan e teñan a súa actividade na
área de Vigo, promovendo así o emprego, e dándolle pulo ás iniciativas
innovadoras que potencien a economía da zona.
A presidenta de
AJE Galicia, Patricia González, aproveitou a xuntanza para expoñerlle a Pedrosa
a inminente celebración do V Congreso de
Jóvenes Empresarios de Galicia, que terá lugar en Vigo os días 26, 27 e 28 do
vindeiro mes de xuño.
Segundo afirmou, esta
quinta edición, na que participará tamén o Consorcio, “servirá de punto de encontro para máis de 350 empresarios de España e
Portugal”, “os que atoparán no congreso un espazo común sobre o que analizar,
debater e aportar posibles vías de solución ás dificultades coas que se atopan
cada día empresarios e emprendedores”, engadiu.