R aposta en Celanova pola comunicación en galego para seguirmos sendo singulares nun mundo globalizado
luns, 9 de setembro do 2013
- Os participantes na entrega do recoñecemento a R, este domingo en Celanova
Finalmente, R xa ten un novo recoñecemento polo seu
labor de promoción da lingua e a cultura galega, e co engadido de
que o premio en cuestión vén dunha entidade representativa da
lingua e a cultura galega: a Fundación Curros Enríquez. O galardón
Celanova, casa dos poetas entregóuselle á operadora esta fin
de semana, dándose a circunstancia de que se trata da primeira que
unha empresa é obxecto desta prestixiosa distinción. O acto contou
coa presenza dos responsábeis da entidade con sede en Celanova
(sendo o mantedor o profesor Felipe Ferreiro, patrón da Fundación),
da presidenta do Parlamento de Galicia, Pilar Rojo, e do conselleiro
delegado de R, Arturo Dopico. A xeira deu comezo ao medido cunha
ofrenda floral diante do monumento de Celso Emilio (co gallo do seu
34 cabodano) e un recital de poemas de Celso Emilio e Curros Enríquez
a cargo dos alumnos do obradoiro de teatro de Celanova, Juan Manuel
Villar e Nacho Núñez.
O acto estivo amenizado coa intervención do grupo
de gaitas do Concello de Celanova. Máis tarde, as actividades
trasladáronse ao Auditorio de Celanova, onde
Arturo Dopico tivo oportunidade de agradecer a distinción e
explicar o porqué da aposta da compañía de telecomunicacións R
pola lingua do pobo do que xurdiu e ao que achega servizos
tecnolóxicos. Ao seu xuízo, o compromiso da compañía co galego
ten amosado en repetidas ocasións firmeza e autenticidade, a fin de
contas, sinalou, R sempre tivo a crenza de que o uso do galego nas
novas tecnoloxías tiña que ser, por forza, “algo natural”.
Dopico fixo saber que “cómpre pensar en galego para ser singulares
nun mundo cada vez máis globalizado”.
Dopico e a empresa que representa recibiron unha
medalla de prata coa imaxe da fachada da casa e as letras “C”
(Celanova, Casa, Celso, Curros e Castor, de Castor Elices) da autoría
de Acisclo Manzano e un gravado realizado por Baldo Ramos. Tal e como
recolleu a acta de concesión do premio, con este acto o Padroado da
Fundación Curros Enríquez quere recoñecer o compromiso que dende a
súa fundación, no ano 1998, “R ten mantido co noso idioma, coa
nosa cultura e coa nosa terra, desexando lanzar con este
recoñecemento unha mensaxe de futuro para a nosa lingua, por
entender que Galicia e o galego poden e deben ser ferramentas válidas
a tódolos efectos no complexo ámbito da enxeñería das
comunicacións e na inmensa rede da globalización”.