R lanza un servizo para axudar ás empresas na obtención de axudas tecnolóxicas
martes, 3 de novembro do 2020
A
operadora R está a impulsar un programa que vai alén de dotar ás
empresas con tecnoloxías para favorecer o seu día a día dixital e
transformador: trátase de axudalas a obter axudas tecnolóxicas. O
programa en cuestión vén da man do equipo de R Empresas e
consiste nun labor de asesoramento ao servizo das firmas da nosa
terra para achandarlles o terreo no que a procura de axudas e
incentivos se refire: axudas e incentivos cos que dar forma aos seus
proxectos.
Segundo
explica a operadora, “trátase dun servizo integral que vai dende a
procura ata a xestión e o acompañamento na tramitación de
subvencións públicas e apoios tecnolóxicos que xorden decote dende
distintas entidades e administracións”.
A
compañía de telecomunicacións lembra que o Programa de
Aproveitamento de Axudas Tecnolóxicas xurdiu do labor de escoita que
realizan as e os profesionais de R Empresas nas súas visitas ás
compañías clientes e no seu seguimento. Froito dese labor
detectaron, en gran parte de responsables empresariais, o
descoñecemento de que os seus investimentos en tecnoloxías poden
recibir axudas de distintos organismos. “A necesidade de estar ao
día das axudas tecnolóxicas e subvencións que puidesen aplicar ás
súas empresas é un aspecto moitas veces esquecido, ao que se xuntan
outros problemas como son as dificultades para facer seguimento das
convocatorias, así como a ausencia de recursos para realizar as
tarefas administrativas que levan consigo”, explica R, poñendo o
foco nunha das características esenciais do novo servizo: realizar
as funcións que as pemes, por si soas, non poden cubrir.
O
programa baséase nun acompañamento integral durante todo o proceso,
dende a formulación do proxecto e a súa aplicación até a
obtención e xustificación da subvención.
Para
iso, os xestores de R Empresas estudan cada caso e seleccionan as
subvencións, tanto as que xorden dende os concellos e deputacións
como dende a administración autonómica ou institucións estatais, e
elixen as que mellor se adaptarían á natureza do proxecto e ás
necesidades da empresa cliente, cun obxectivo claro: “Maximizar o
aproveitamento das axudas dispoñíbeis en beneficio do cliente”. A
continuación, o servizo a empresas expón a redacción de todos os
documentos necesarios para presentar a solicitude, incluíndo a
memoria técnica e a memoria económica do proxecto.
O
programa tamén cubre o inventariado da documentación para
xustificar a subvención, así como elaborar as memorias finais, como
un paso máis dentro do proxecto.