R rematou ano impulsando partys informáticas, xiras formativas e unha aceleradora de startups
xoves, 3 de xaneiro do 2019
A
operadora
galega R pechou ano mostrando algúns dos seus principais froitos
tecnolóxicos e empresariais colleitados ao longo dos 12 meses que
vimos de deixar atrás. O balance, como
sinalamos onte en Código Cero, puxo o foco en logros como o de
ter levado a súa fibra avanzada a oito concellos máis da nosa terra
(Abegondo, Cerceda, Cuntis, Lourenzá, Barreiros, Palas de Rei,
Monterroso ou Muros), ou o feito de ter conseguido cubrir 81 dos
nosos polígonos cos seus accesos á Rede de alta velocidade. O
informe non se esgotou aí, xa que ten vertentes relevantes no eido
da cultura. Neste eido, R colaborou en festivais, multitudinarias
quedadas informáticas e xiras maker. Tamén
fixo posíbel a posta en marcha dunha aceleradora de startups
e unha cátedra interuniversitaria en ciberseguridade.
En
materia de cultura, a operadora galega colaborou este ano nunha
manchea de festivas e eventos (Resurrection Fest, Fic Bueu, Primavera
Cine ou Son Rías Baixas) e impulsou actividades de seu como os
obradoiros Crea R e Nativos R, destinados a facernos avanzar nos
nosos coñecementos de tecnoloxías, informática e robótica.
Asemade, organizou a xira tecnolóxico-humorística Monólogos R (nos
que deu conta dos seus vinte anos de historia e das cousas dixitais
que aconteceron ao longo desas dúas décadas) e forneceu de
infraestrutura de conexión a eventos multitudinarios tan relevantes
como as partys informática XGN R Encounter (Xuventude Galicia Net,
agora en Silleda) e ICC Technium R Encounter (a quedada dixital de
Ourense, organizada no marco da ICC Week da Deputación).
Por
outra banda, R tamén impulsou a
aceleradora de proxectos de contidos dixitais DiCo Challenge (un
proxecto para xerar emprego e innovación, lanzada este outono pasado
con cinco retos a superar polas nosas novas startups) e, xunto
coas universidades de Vigo e Coruña, a
operadora fixo posíbel a posta en marcha da Cátedra R de
Ciberseguridade, unha iniciativa para converter a nosa terra en
referente da investigación e a divulgación en materia de
tecnoloxías de protección dixital. Respecto da Cátedra R, lembrar
que sería a primeira cátedra interuniversitaria existente en
Galicia e que o seu obxectivo concreto é promover “o
desenvolvemento das competencias profesionais do alumnado
universitario, mellorar a capacitación e ampliar os coñecementos,
técnicos e habilidades dos membros da comunidade universitaria e
doutros profesionais”. A Cátedra R traballará nos seguintes
puntos:
·
Colaboración na docencia+investigación (Mestrado Interunivesitario
en Ciberseguridade)
·
Creación de programa de captación de talento (alumnado ambas as
dúas Universidades)
·
Creación de espazos para a difusión e o debate sobre
ciberseguridade
·
Capacitación en competencias relacionadas coa protección en liña
tanto dentro da comunidade universitaria coma fóra dela, tendo en
conta as necesidades competitivas das empresas.