ReAcciona apoiou preto de 3.000 proxectos para mellorar a nosa competitividade
luns, 4 de xullo do 2022
O
IGAPE
vén de facer balance do acadado a través do programa ReAcciona,
impulsado polo instituto pertencente á Consellería de Economía co
obxectivo de mellorar a competitivade das nosas empresas mediante
iniciativas concretas de apoio e poñendo á súa disposición
servizos de alto valor engadido (coa colaboración e asesoramento de
especialistas). En concreto, ReAcciona leva prestado apoio a máis de
2.900 proxectos desde a súa posta en marcha en 2012.
En
total, a través das súas diferentes edicións, o ReAcciona suma
preto de 13 millóns de euros en apoios que mobilizan un investimento
público-privado final de 15,5 millóns.
“Con
este programa promóvese o acceso a servizos de alto valor engadido
co apoio de expertos en ámbitos como o desenvolvemento estratéxico,
a dixitalización e a innovación”, informou o IGAPE, engadindo que
durante estes anos puideron impulsarse na nosa terra servizos “en
ámbitos moi diversos, como o relanzamento comercial, os centrados na
produción e cadea loxística, ou os de análise do potencial
competitivo”.
No
eido da transformación dixital, as empresas solicitaron diagnósticos
de Industria 4.0 e de dixitalización, ademais de solucións de
xestión e mobilidade dixital e apoio na mercadotecnia.
Así
mesmo, tamén se teñen impulsado servizos en innovación, para
axudar ás pemes galegas no deseño de produtos e servizos
innovadores, afondando na protección e financiamento dos mesmos; ou
no ámbito do desenvolvemento estratéxico, a profesionalización e a
dixitalización, con servizos relativos á implantación dunha
estratexia dixital da empresa, á ciberseguridade ou a mercadotecnia
de contidos.
De
carácter eminentemente práctico, no desenvolvemento do programa
teñen colaborado a Vicepresidencia Económica (a través do
Instituto Galego de Promoción Económica e da Axencia Galega de
Innovación, GAIN) e a Axencia para a Modernización Tecnolóxica de
Galicia (AMTEGA).
Lembrar
que en 2020 púxose en marcha a liña específica ReAcciona COVID-19,
que “permitiu cooperar coas pemes na conxuntura económica marcada
pola pandemia, contribuíndo ao seu impulso e recuperación”.
Cun
orzamento de 3,6 millóns, ReAcciona COVID-19 sumou cinco novos
servizos que atenderon á situación económica xurdida naquel
momento. As empresas galegas puideron acceder, así, a prestacións
especializadas no relativo á adecuación dos estados financeiros, á
transmisión ou adquisición de unidades produtivas, á análise de
mercados internacionais, á elaboración de plans estratéxicos de
internacionalización e á implementación de procesos acordes á
economía circular.