Recibidas tres ofertas de empresas para redactar o proxecto do Centro de Ciberseguridade de Galicia
luns, 18 de xullo do 2022
Finalmente
o
Goberno galego recibiu tres ofertas de empresas para a elaboración
do proxecto e dirección das obras do Centro de Excelencia en
Ciberseguridade de Galicia, en San Cibrao das Viñas (Ourense),
no Parque Tecnolóxico de Galicia (Tecnópole). Este proxecto, cuxa
execución suporá un investimento de 4,2 M€, ten como obxectivo
contribuír á protección dixital da administración pública, da
cidadanía e das empresas; apoiar a innovación no sector produtivo
mediante o logro da excelencia na investigación; así como fomentar
desenvolvemento de talento especializado en ciberseguridade.
A
Xunta prevé adxudicar en outono este contrato para a redacción do
proxecto construtivo, licitado por preto de 220.000 €, para telo
rematado na próxima primavera. Logo iniciarase a contratación e o
arrinque das obras, sendo a previsión poñelo en marcha a mediados
do 2025.
Este
novo centro xorde directamente da colaboración entre a Consellería
de Facenda, a través da Axencia para a Modernización Tecnolóxica
de Galicia (AMTEGA), impulsora deste proxecto, e a Consellería de
Infraestruturas e Mobilidade, que acometerá as obras de edificación.
Esta intervención será financiada con fondos do Mecanismo de
Recuperación e Resiliencia, do programa Next Generation UE.
O
Centro de Excelencia en Ciberseguridade de Galicia habilitarase na
parcela 3E da Tecnópole, en San Cibrao das Viñas, que conta con
algo máis de 3.000 m². O edificio, con máis de 2.000 m² de
superficie construída, dará acubillo a espazos de monitoraxe e
xestión da ciberseguridade, áreas de traballo e concienciación,
zonas de uso externo e locais de emprendemento e de aluguer para
empresas privadas. Os traballos completaranse cunha área para o
estacionamento, prevendo habilitar arredor de 40 prazas de
aparcadoiro.
En
palabras de AMTEGA, o Centro de Excelencia en Ciberseguridade de
Galicia converterase nun punto de encontro entre “a innovación en
materia de protección tecnolóxica e as necesidades e retos da
sociedade”. E engade: “Coa posta en marcha deste edificio, a
Comunidade dá un paso importante no camiño dunha Galicia
intelixente que aposta polo crecemento da economía galega baseado
nas tecnoloxías, cara a unha Galicia mellor”.
O
centro traballará en colaboración coas deputacións provinciais,
coas entidades locais, a través da FEGAMP, coas universidades
galegas e centros tecnolóxicos e de innovación e co tecido
empresarial do sector. A vocación deste centro é estar á
disposición de toda a sociedade.