Ribeira e Santiago, distinguidas como Cidades da Ciencia e a Innovación
mércores, 11 de febreiro do 2015
- O alcalde de Ribeira, Manuel Ruiz, recollendo o galardón
A
entrega de recoñecementos Cidades da Ciencia e a Innovación 2014,
celebrada en Burgos, tivo notábel presenza galega. Por unha banda a
de Ribeira, que
como lembraremos foi distinguida como urbe I+D a finais do ano
pasado, salientándose daquela proxectos como a posta en
funcionamento dunha plataforma
Web-Xis no marco do programa
Ribeira Atlántica 2015 (financiado nun 70% con fondos europeos
FEDER) e co obxectivo de converter a dita localidade nunha Smart
Village. Por
outra banda, tamén recolleu a distinción de mans do Goberno central
(Ministerio de Industria e Economía) o Concello de Santiago, máis
polo miúdo a concelleira de Desenvolvemento Urbano Sostible, Teresa
Gutiérrez. En representación de Ribeira, acudiu a Burgos o alcalde,
Manuel Ruiz
Rivas.
A
cita contou coa presenza de alcaldes e concelleiros das novas quince
cidades distinguidas co devandito recoñecemento, amais de Ribeira e
Santiago. Todas elas pasan agora a incorporarse á Rede Innpulso,
unha iniciativa para promover a concorrencia das vilas e cidades do
ámbito estatal en todo tipo de xuntanzas e programas internacionais
relacionados coa innovación e o desenvolvemento tecnolóxico. A
través de Innpulso, tanto Ribeira como Santiago serán consideradas
referentes para o emprazamento de infraestruturas científicas e
tecnolóxicas de titularidade ou participación estatal. Tamén serán
susceptíbeis de acubillar nodos da rede do Ministerio ou congresos e
eventos vencellados á ciencia e á innovación, entre outras cousas.
A
entrega de galardóns tivo lugar no Palacio de Congreso de Burgos, o
Fórum Evolución. Estivo presidido pola secretaria de Estado de
I+D+i, Carmen Vela, e polo alcalde da localidade burgalesa, Javier
Lacalle. E participaron os presidentes actuais da Rede Innpulso, que
son os rexedores de Móstoles e Baracaldo.
Segundo
fixo saber Ruiz Rivas con motivo do recoñecemento, “este premio
supón unha oportunidade para aprender doutras cidades con máis
bagaxe có noso no camiño da innovación”. Ademais, explicou que
son catro os piares nos que se fundamentou o proxecto de Ribeira como
Cidade Intelixente: “En primeiro lugar, a creación dunha Web-Xis
que se apoia nas novas tecnoloxías para conquerir un concello máis
transparente, máis próximo ao cidadán e máis eficiente na xestión
dos servizos públicos; en segundo lugar, a elaboración dun Plan de
Mobilidade Urbano Sostible integrado por 46 actuacións encamiñadas
a acadar unha maior cohesión territorial; en terceiro lugar, a
realización dun Plan de Eficiencia de Residuos Sólidos urbanos que
aposta polo xeoposicionamento para a optimización de rutas; e por
último, un Plan de Eficiencia Enerxética que suporá que o noso
sexa un dos primeiros concellos de Galicia en ter un alumeado
exterior integramente de tecnoloxía LED”.
En
total, foron quince as novas cidades distinguidas ao longo dun evento
de algo máis dunha hora e media de duración. Amais de Ribeira e
Santiago, foi salientado o labor Alzira, Ávila, Molina de Segura,
Ontinvent, Palencia, Sant Feliú de Llobregat, Alcalá de Henares,
Logroño, Mataró, Oviedo, Pamplona, Sabadell e San Cristóbal de La
Laguna.