Richard Stallman avoga dende Vigo por rachar coas presións da gran industria
martes, 10 de decembro do 2013
Na
mañá de onte luns o fundador do movemento polo software libre,
Richard
Stallman
asistía en Vigo
a un coloquio
inserido no marco da Conference
on Methodologies, Technologies and Tools enabling e-Governmet,
MeTTeG 2013, no que subliñaba o que para el son os alicerces base do
mundo da informática, que o levaban a rachar en 1980, dende o seu
posto no Laboratorio de Intelixencia Artificial do Instituto
Tecnolóxico de Massachusetts (MIT), coas presións da industria por
substituír o software libre que até entón empregaba, por outro
privativo ou non libre. Stallman engadía que co software libre
“respéctase a liberdade dos usuarios”, mentres que co software
privativo “é o programa quen ten o control sobre o usuario, e máis
concretamente o dono do programa quen exerce o control. É un poder
inxusto que ten o software privativo que non debería existir e aí
que a meta do movemento polo software libre sexa a liberación do
ciberespazo para que o usuario teña liberdade”.
O
fundador do sistema GNU
impartía na tarde de onte un relatorio ao abeiro da Conference
on Methodologies, Technologies and Tools enabling e-Governmet,
MeTTeG 2013, organizada polos investigadores do grupo de Enxeñaría
de Sistemas Telemáticos da Universidade de Vigo, coa colaboración
do Concello de Vigo e da Rede Galega de Procesamento da Linguaxe e
Recuperación da Información. Nel demandaba perante os medios de
comunicación a migración dos estados e todos os centros de ensino
de todos os niveis ao software libre como garante da liberdade dos
usuarios. Stallman falou tamén das “funcionalidades malévolas”
dos programas privativos que “espían e restrinxen” aos usuarios
sen que estes teñan
coñecemento. Tal
é o caso -segundo Stallman- de Windows, Mac, Flashplayer ou Kindle
de Amazon e mesmo “o software de case todos os móbiles que teñen
portas traseiras para convertelos en dispositivos de escoita”.
O
fundador do movemento
polo software libre estivo acompañado polo vicerreitor de Extensión
Universitaria e Relacións Internacionais da Universidade de Vigo,
Manuel Fernández; o concelleiro de Fomento e Transportes, David
Regades e o profesor da Universidade de Vigo e membro da organización
da Conference
on Methodologies, Technologies and Tools enabling e-Governmet,
MeTTeG 2013, Luís Álvarez Sabucedo, que deixaron claro o compromiso
das institucións ás que representan coa administración dixital, o
software libre e a recuperación de aparellos informáticos, ao tempo
que salientaban a importancia de contar coa presenza de Richard
Stallman en Vigo.
Asemade,
Richard Stallman amosábase claro de cara á necesidade de erradicar
o software privativo do ensino, xa que “introduce a dependencia e
vai contra a misión social de educar cidadáns solidarios, libres e
independentes”. Amais, non dubidou en acusar ás empresas de
software privativo de actuar como “traficantes de drogas” cando
achegan de xeito gratuíto ás escolas copias dos seus programas,
algo que para Stallman é como “ofrecer gratis a primeira dose para
introducir a dependencia”. É por iso que segundo Stallman “o
software libre é esencial na escola para a educación moral da
cidadanía” dado que fomenta a axuda aos demais ou a boa vontade, a
través por exemplo de compartir códigos fonte entre os membros
dunha clase.
O mesmo opina Stallman sobre os estados, a todos os
niveis, para que así poidan “recuperar a soberanía informática
do país, porque no caso contrario estase a someter o estado aos
donos dos programas, o que prexudica a seguridade nacional”. Dende
Vigo exhortou aos estados, para garantir a seguridade nacional, a
“rematar co software privativo”.