Richard Stallman vén ao MeTTeG de Vigo para falar de software libre e da administración que nos vén
martes, 26 de novembro do 2013
O congreso MeTTeG
é un congreso que vén en entregas. E está ben que así sexa, deste
xeito a pegada increméntase. Como lembraremos, a nova edición
desta xuntanza, a sétima, comezou a desenvolverse o pasado mes de
outubro, no Hotel Bahía de Vigo, onde contou diversos relatorios
sobre Administración Dixital, as cidades intelixentes, os datos en
aberto e máis a seguridade e privacidade das comunicación. Esta
nova convocatoria do congreso, no que participaron investigadores
dunha chea de países (España, Suíza, Italia, Suecia, Holanda,
Serbia, Bélxica, Uzbequistán e Hungría), vai contar en breve cunha
máis que interesante prolongación. E non unha prolongación
calquera: unha conferencia presidida por Richard
Stallman, a celebrar o 9 de decembro.
Lembrar que MeTTeG vén
da man dos investigadores do Grupo de Enxeñaría de Sistemas
Telemáticos co soporte do Concello de Vigo e a Rede Galega de
Procesamento da Linguaxe e Recuperación da Información.
Trátase da segunda vez
que este congreso se celebra en Vigo, tras
unha anterior edición na cidade en 2009 que tivemos ocasión de
reflectir en Código Cero facendo fincapé nos éxitos e nas
eivas que daquela estaba a amosar o proceso de dixitalización das
institucións públicas e as súas canles de comunicación coa
cidadanía.
“É para nós unha honra que esta conferencia se
celebre por segunda vez na cidade de Vigo, desta volta de novo coa
participación dos axentes implicados en diferentes eidos da
administración dixital”, explicou antes do comezo desta sétima
edición Luís Álvarez Sabucedo, membro do grupo organizador, que
nos situou daquela un 80% dos participantes no ámbito académico e o
20% restante no empresarial e da administración.
O caso é que MeTTEG 2013
segue adiante, con Richard Stallman como inmellorábel colofón. A
súa conferencia, como non podía ser doutro xeito tendo en conta o
miolo do seu discurso, será aberta para todo o público interesado
(contando con acceso prioritario, iso si, as persoas
rexistradas no congreso). Para quen non saiba nada de Stallman a
estas alturas (cousa ben rara entre os lectores de webs como Código
Cero), dicir que en boa medida é o culpábel de que hoxe en día
haxa un movemento tan interdisciplinar e multicanle como o software
libre, un movemento que comezou avogando pola extensión de programas
sen licenzas pechadas pero que hoxe en día mesmo deixa pegada no
noso xeito de traballar, convivir ou comunicarnos. Stallman e outros
puxeron en marcha todo isto en 1983, acompañado do desenvolvemento
do sistema operativo GNU no 1984. E
que é iso do GNU?
Pois GNU é o mesmo que dicir software libre, isto é: todo o mundo é
libre de copialo e distribuílo, así como tamén de realizar cambios
de meirande ou menor magnitude. O sistema GNU/Linux é arestora
empregado en decenas de milleiros de computadores.
Engadir que
Richard Stallman recibiu o premio Grace Hopper da ACM (ACM
Grace Hopper Award), unha bolsa da Fundación MacArthur, o
premio Pioneiro da Fundación Fronteira Electrónica e o
premio Takeda pola Mellora Social/Económica, así
como tamén varios doutorados honorarios.
A cita con Stallman será
no edificio do teatro da Fundación NovaCaixaGalicia na rúa García
Barbón o vindeiro luns, 9 de decembro ás 19h. A charla levará por
título O
software libre a Administración Dixital.