Rodríguez-Andina (UVigo), á fronte da IEEE Industrial Electronics Society
venres, 4 de decembro do 2015
Juan José
Rodríguez-Andina, profesor do Departamento de Tecnoloxía
Electrónica (UVigo), vén
de ser nomeado vicepresidente da Conference Activities da IEEE
Industrial Electronics Society, sociedade inserida nunha entidade
máis ampla, o IEEE ((Institute of Electrical and Electronic
Engineers), que pasa por ser a meirande asociación profesional
tecnolóxica do ámbito internacional, con máis de 400.000 membros
traballando dende todos os recantos do mundo e cuxo lema compartido é
“facer avanzar a tecnoloxía ao servizo da humanidade”. O
profesor da Universidade de Vigo non é un acabado de chegar á dita
asociación. De feito, leva dende 2013 á fronte da IEEE
Industrial Electronics Magazine, en palabras da institución
académica “unha das revistas de maior impacto a nivel mundial no
eido da Enxeñaría Eléctrica e Electrónica”.
Os intereses
profesionais dos integrantes do IEEE abranguen “un moi amplo
espectro de áreas técnicas”, entre as que se atopan a enxeñaría
eléctrica e electrónica, as tecnoloxías da información, as
ciencias da computación ou a intelixencia artificial, entre outras.
Esta é a razón, sinala a UVigo, de que o instituto se artelle en
sociedades centradas cada unha dela nun eido concreto de traballo.
Unha destas sociedades é a IEEE Industrial Electronics Society
(IES), da que Rodríguez-Andina será vicepresidente nos vindeiros
tres anos.
Esta sectorial organiza
e promove actividades relacionadas coa aplicación dos sistemas de
control intelixentes, robótica, comunicacións industriais e
automatización da produción, adquisición e procesado de sinais
eléctricas, sistemas dixitais avanzados ou electrónica de potencia.
Dentro destas actividades, engade a Universidade, inclúese a
publicación de revistas especializadas (que se atopan nos primeiros
postos nos ránkings internacionais de calidade) e a
organización cada ano de tres congresos mundiais de amplo espectro e
outros de temas específicos. Segundo reflicte Rodríguez-Andina, “o
maior evento mundial de Electrónica Industrial en 2007 foi a edición
de ISIE celebrada en Vigo”, da que el foi coordinador. De maneira
complementaria a sociedade IES promove actividades educativas, entre
elas o curso de verán que se está a organizar para 2016 de forma
conxunta entre a Escola de Enxeñería Industrial de Vigo e North
Carolina State University.