Ryanair lanza guías de viaxes en liña de balde
venres, 28 de maio do 2010
Ryanair, a
aeroliña de baixo custe que une as cidades galegas con distintos destinos
europeos a un prezo bastante económico, vén de por en marcha máis de 100 guías
de destinos en liña que se poden consultar de balde, e que lle facilitan aos
pasaxeiros e pasaxeiras a información dos destinos máis coñecidos de Ryanair,
así como tamén daqueles outros non tan coñecidos aos que nalgún momento soñamos
con chegar.
Estas guías,
foron elaboradas polos responsables de comunicación da compañía en colaboración
cos especialistas dixitais en contidos de viaxes en liña, Frommer’’s® Unlimited,
a división de negocio de Frommer’’s (un selo de marca de Wiley), os cales,
sabedores de que as persoas viaxeiras perden horas investigando sobre un
destino concreto na Rede, ofrecéronlle a posibilidade de atopar información de
maneira rápida e concisa.
Os documentos en
liña conteñen, entre outras cousas, información sobre as actividades e tours, a vida nocturna, as atraccións
locais, os eventos actualidados de cada destino, etc, así como datos de
interese sobre comidas e bebidas típicas de cada lugar, información dos
aeroportos, tipo de clima...
As guías de
destinos de Ryanair actualizaranse periodicamente para, segundo informan dende
a compañía, permitirlle ás pequenas empresas locais “ofrecer excelentes ofertas de viaxes aos 73 millóns de pasaxeiros de
Ryanair”; desta maneira, engaden, “o
turismo local terá a oportunidade de medrar na mesma medida que o número de
pasaxeiros da compañía”.
Ryanair ofrece na
actualidade un total de 1.100 rutas e malia que son bastantes, os pasaxeiros
buscan, cada vez máis, “viaxar a novos
destinos interesantes”. Así o vén de afirmar o responsable da compañía, Stephen McNamara, que engadiu
que as súas guías de destinos gratuítas en liña, “axudarán tanto aos novos viaxeiros como aos máis experimentados a
decidir onde queren ir”.
Pola
súa parte, Giles Longhurst, director de Frommer´s Unlimited afirma que con
estas guías, “que conteñen os mellores
eventos e a previsión do tempo, sempre hai unha boa razón para viaxar e para
escollera as vacacións que mellor nos conveñan”.