SEALAB pon en xogo robótica para mellorar a calidade das nosas augas
xoves, 22 de novembro do 2018
En
abril comezou a coller corpo un ambicioso proxecto para empregar as
máis avanzadas tecnolóxicas de análise de datos (Big Data)
e robótica para mellorar a calidade das nosas augas. Trátase
do proxecto SEALAB e nel participan profesionais da nosa terra: por
exemplo os da empresa Imatia, achegando a súa ampla experiencia
en Industria 4.0, plataformas de xestión, analítica de información
e desenvolvemento de software.
O
obxectivo de SEALAB, máis en detalle, é optimizar os servizos de
estudo e seguimento de sustancias prioritarias en augas interiores
“mediante o desenvolvemento e integración de nanosensórica
robótica e sistemas avanzados de xestión de datos”. O proxecto
está liderado por Indrops, e, ademais de Imatia, participa
Industrias Ferri.
Nun
plano aínda máis concreto, búscase dar forma a un novo servizo de
seguimento da calidade das rías, os ríos e os mares baseado na
posta en marcha dun laboratorio portátil a bordo dun vehículo de
superficie non tripulado e de doado despregue. Segundo informa
Imatia, o laboratorio incorporará nova sensórica baseada no uso de
Tecnoloxías Facilitadoras Esenciais (Lab-on-a-chip) para a
determinación de sustancias prioritarias, medida de parámetros
físico-químicos auxiliares e toma de mostra automatizada. Terá
capacidade para facer avaliacións in situ de todo tipo de parámetros
físico-químicos, complementándose cun sistema de toma de augas que
será integrado en embarcacións non tripuladas (USV).
O
proxecto tamén se dirixe a mellorar o emprego de embarcacións non
tripuladas (USV) para a monitoraxe das augas augas costeiras e de
transición, optimizando parámetros como a propulsión, o
posicionamento, as comunicacións e a navegación para, en palabras
de Imatia, “dar resposta ás necesidades concretas do servizo e
asegurar a representatividade das mostras”.
A
maiores, SEALAB facilitará a empregabilidade do servizo con vistas
ao usuario final, e farao coa posta en marcha de aplicacións
software que faciliten a xestión das misións robotizadas e a
visualización e interpretación dos datos recolleitos.
SEALAB
pertence ao Programa Conecta PEME 2018, axudas para a realización de
proxectos de I+D+i en colaboración entre empresas en áreas
estratéxicas para Galicia. Está financiado pola Axencia Galega de
Innovación (GAIN) da Xunta de Galicia, Consellería de Economía,
Emprego e Industria da Xunta de Galicia, e Fondo Europeo de
Desenvolvemento Rexional (FEDER), con cargo ao programa operativo
FEDER 2014-2020.