San Teleco supera o mal tempo con torneos, xeiras de videoxogos, churrascada e espírito solidario
xoves, 3 de outubro do 2013
Pola banda de Vigo
están de festa. Máis polo miúdo pola banda da Escola Enxeñaría
de Telecomunicación, onde comezaron este mércores as actividades da
festa dos seus estudantes, San Teleco, celebración
que este ano vén máis que nunca con feitura de romaría popular,
cinguíndose dous mundos non tan contrapostos como moitos cren: o
mundo das canles innovadoras de comunicación e o da xuntanza
campestre tipicamente galega. Finalmente estanse a dar cita nas
diversas actividades centos de mozas e mozos, e iso que na súa
contra teñen unha cousa a ter moi en conta: o mal tempo. Con todo,
houbo marxe para o humor na adversidade, cousa por outra banda
tipicamente nosa, e que se resume coa seguinte frase dos
organizadores: “Por sorte, e tras cinco anos, case non chove”.
A
festa comezou coa procesión dos mecos, deseñados polos alumnos e
alumnas do primeiro curso, desta volta ca feitura dos protagonistas
da película de Pixar, Wall-E,
e ao son da música de Cé Orquestra Pantasma. De menú houbo
cousas tamén moi nosas: churrasco, chourizos asados, polbo,
empanada, bocadillos e para entreterse xogos, por exemplo, para
buscar parella.
Con todo, e segundo nos
lembra a UVigo, a celebración de San Teleco arrincou xa hai
varias semanas cos tradicionais campionatos deportivos de fútbol 7 e
baloncesto 3x3, ademais dos torneos de videoxogos como League of
Legends, Guitar Hero ou Mario Kart e de cartas. Rubén
Suárez, un dos membros da organización que este ano compoñen
arredor de 12 alumnos e alumnas, explicou ao departamento de prensa
da UVigo que a idea foi deseñar un programa de actividades máis aló
da festa para que “a xente faga cousas, se divirtan e non estean
sentados”. Neste sentido a Delegación de Alumnos da EE de
Telecomunicación contou coa colaboración da Asociación Trabalingua
na organización de xogos tradicionais galegos, como a billarda e o
tres en raia humano. Membros da Liga Sur de billarda desenvolveron un
obradoiro e un torneo aberto para todos aqueles interesados neste
deporte.
Volvendo ás
actividades previstas, dicir que terán prolongación esta semana
(máis torneos e accións de lecer, ao aire libre sempre que o
temporal o permita) e no mes de novembro cunha chocolatada solidaria.
Esta iniciativa, que xa desenvolveron os alumnos o pasado curso, ten
como obxectivo recadar fondos para o Banco de Alimentos.