Santiago comeza o proceso para transferir Tropa Verde a outras cidades europeas
xoves, 14 de xuño do 2018
Santiago
vai exportar a súa iniciativa de premios á cidadanía pola súa
responsabilidade ambiental a outras cidades europeas. Así
se fixo saber onte nunha xuntanza celebrada en Budapest: a primeira
reunión da Rede de Transferencia do programa europeo Urbact que
lidera o Concello de Santiago, a través do programa Tropa Verde.
Segundo vén de informar o Goberno compostelán, ao longo de medio
ano a rede tentará captar novas urbes para “unirse” á súa
comunidade green: cidades de Hungría, Polonia, Francia ou
Portugal (Guimarães). Lembrar que Santiago lidera unha das 25 redes
de Urbact, de intercambio de recursos para o desenvolvemento urbano
sustentábel e integrado, a través do proxecto Tropa Verde.
Como lembraremos, Tropa
Verde é unha
iniciativa ecolóxico-tecnolóxica de
Compostela, impulsada
en 2015 polo Concello de Santiago e pola empresa local Teimas
para recoñecer e recompensar con premios concretos o compromiso da
cidadanía co medio ambiente e coa xestión sostíbel de refugallos
(electrónicos e eléctricos, pero tamén de outros moitos tipos). O
programa, que celebrou os días pasados o seu terceiro aniversario,
tamén ten presenza activa en Lugo, Ames, Redondela ou Porriño.
Para facernos unha idea dos logros acadados pola
iniciativa en Santiago, coa colaboración dos centros socioculturais
do concello e dos puntos limpos de Compostela, conseguíronse xa
3.000 usuarios da Tropa Verde SCQ, 1.500 recompensas repartidas, máis
de 10.000 cheques trocados por estrelas e un galardón, o Premio R de
Ecoembes 2016 (na categoría de mellor campaña de sensibilización
das administracións públicas) que non fixo máis que darlle novos
azos á iniciativa.