Santiago lanza novo portal para permitir á veciñanza consultar o estado do orzamento municipal
martes, 18 de outubro do 2016
O Concello
de Santiago vén de presentar unha nova web dirixida a favorecer a
implicación da cidadanía na vida pública local e, tamén, a
impulsar a transparencia. Trátase de Orzamento
Aberto, un portal onde a veciñanza poderá consultar as contas
municipais, achegando unha xanela directa ao estado do orzamento
compostelán. Segundo fixo saber a concelleira de Economía e Facenda
María Rozas, o sitio en cuestión será actualizado cada tres meses.
Entres os seus “ingredientes”, figuran unicamente elementos open
data que lle permitirá ao
Concello facer algo máis que “pendurar información económica en
bruto e en diferentes soportes”. A idea, engadiu Rozas, “é
achegar coñecemento o máis claro posíbel”.
O portal de orzamentos conta con catro pestanas
principais: Visión global, Políticas, O que ti achegas e Que
significa? Na primeira dáse unha idea xeral dos ingresos do
Concello, explicando as diferentes formas de financiamento. Nesta
pestana tamén se explica como emprega o Goberno local eses cartos.
Na segunda, que leva por nome Políticas, aparece reflectida
a porcentaxe que cada área asume dos 99,4 millóns de orzamento
municipal. A maior porcentaxe é o espazo que a propia web adica a
cada unha das áreas.
A pestana O que ti achegas é
unha calculadora de tributos na que a veciñanza pode coñecer cantos
cartos van ás arcas públicas sumando os impostos que pague na
cidade. A última pestana é a que máis se dirixe a simplificar a
información e facela comprensíbel. De feito, no apartado Que
significa defínense os termos económicos que adoitan usarse ao
falar de orzamentos.
Na rolda de prensa, María Rozas estivo acompañada
por Sonia Pérez, da Fundación Civio, quen explicou os detalles
técnicos da plataforma e fixo un repaso polos concellos onde están
integradas e habilitadas este tipo de plataformas.