Santiago presenta en FITUR dúas ducias de vídeo-guías para os turistas 3.0
mércores, 19 de maio do 2021
O
Concello de Santiago está no salón FITUR, a feira máis referencial
do ámbito turístico en territorio español, dando conta das súas
últimas novidades en materia turístico-tecnolóxica. Entre
estas novidades figuran as súas novas vídeo-guías, coas que o
Goberno compostelán quere apostar de cheo polo “turista 3.0”.
Segundo
fixeron saber o alcalde de Santiago, Xosé Sánchez Bugallo, e o
concelleiro de Turismo, Sindo Guinarte, o obxectivo é atender as
demandas dun tipo novo de viaxeiro “caracterizado por un uso
intensivo de Internet e redes sociais, recursos que emprega en todo o
proceso dunha viaxe, dende a selección do destino ata a súa
valoración unha vez rematado, compartindo a súa opinión na Rede”.
A
presentación desta proposta en FITUR titulouse Santiago, ao outro
lado do espello, coa idea de amosar a cidade como “un destino
amplo e diverso, cunha gran oferta de recursos turísticos que van
moito máis alá da Catedral e as súas prazas e rúas próximas”.
A finalidade, dixeron, “é amosar á cidade que está máis alá do
espello, unha cidade verde, de cultura e patrimonio, festiva,
creativa, cunha gran gastronomía e con mil motivos máis para
alongar a estadía nela”.
En
total elaboráronse 26 vídeo-guías de distintos monumentos, parques
e espazos de Santiago, que suman arredor de dúas horas de imaxes da
cidade, rodadas polo director Fernando Cortizo. Cada unha delas guía
inclúe entradas e ilustracións especiais, que, segundo fixeron
saber o alcalde máis o concelleiro de Turismo, “fan máis
atractiva a súa visión, pensando no turista que emprega Internet de
xeito intensivo para elixir o seu destino e decidir que visitar e
canto tempo pasar en cada lugar”.
No
vídeo de promoción das guías, feito tamén por Cortizo,
aparecen Rosalía de Castro, Castelao, Valle-Inclán, as Dúas Marías
e múltiples personaxes que forman “parte da esencia de Santiago”.
As
vídeo-guías están dispoñíbeis en sete idiomas (galego, castelán,
inglés, francés, portugués, italiano e alemán). Ademais,
elaborouse tamén unha versión en linguaxe de signos española para
fomentar a accesibilidade. Pódense
ver xa na páxina web de Turismo de Santiago.