Santiago relanza con máis contidos a web Compostela Literaria
mércores, 25 de xaneiro do 2023
A
concelleira de Acción Cultural de Santiago, Mercedes Rosón,
presentou este mércores 25 de xaneiro unha iniciativa tecnolóxica
para reforzar e visualizar os fortes vencellos cos libros da capital
de Galicia. Trátase do relanzamento de Compostela
Literaria,
unha web actualizada que inclúe un mapa das obras e autores e
autoras ligados a Santiago, así como outros recursos e artigos. Na
rolda de prensa Rosón estivo acompañada de Óscar Senra, da
cooperativa Maos Innovación Social. Segundo fixeron saber, a web
foi totalmente remodelada e enriquecida con novos contidos.
Artellada
ao estilo dunha guía, comprende tanto un mapa literario como unha
mostra de obras, autoras e autores de “marcada compostelanía, sexa
esta nativa ou adoptiva, sexa por relevancia ou por intensidade”,
explicaron, engadindo que a proposta “complétase cunha serie de
recursos lúdicos, como xogos didácticos ou un escape city, e
con diversos artigos escritos por persoas relacionadas co mundo da
literatura, como María do Cebreiro ou Antía Otero”. Inclúese
ademais a sección participativa Microficcións, á que
calquera persoa pode enviar as súas propias creacións. “Compostela
Literaria quere ofrecer unha visión panorámica da relación entre a
nosa cidade e a literatura", sinalou Rosón, engadindo que o
obxectivo principal é “fornecer pistas e suxestións para coñecer
esa prolífica relación da nosa cidade coa letra impresa”.
Algúns
nomes que poden encontrarse na web son clásicos como os de Rosalía
de Castro, Arturo Cuadrado, Concha Castroviejo ou Xoana Torres,
ademais de outros máis actuais, como Suso de Toro, Berta Dávila,
Daniel Asorey, Marga Tojo ou Patricia Janeiro. Tamén recolle as
contribucións de grandes persoeiros do mundo das letras como
Federico García Lorca, Emilia Pardo Bazán ou Valle-Inclán.