SmartPEME achega ao tecido empresarial de Tui recursos avanzados sobre TIC
venres, 25 de novembro do 2016
Dende
Código
Cero fomos anunciando o espallamento paseniño do proxecto SmartPEME
pola provincia de Pontevedra. Desta volta é
a quenda de Tui, onte presentábase no
edificio da Área Panorámica da vila a
dita proposta (substituta
do antigo CPAE 2.0) por parte do deputado
de Innovación e Promoción Económica, Javier Dios.
SmartPEME quérese facer un oco
entre o tecido empresarial de Tui coa finalidade de
introducir novas
formulacións en
materia de estratexia dixital. Estamos perante un novo modelo de
servizo encamiñado á mellora competitiva das Pequenas e Medianas
Empresas (PEME), persoas emprendedoras e autónomas na procura dunha
mellora nas vendas e nas tarefas, abrindo camiños de actuación para
chegar aos e ás emprendedoras, ás asociacións empresariais e aos
axentes de dinamización en concellos. Todo iso empregando as
Tecnoloxías da Información e da Comunicación (TIC) e as novas
tecnoloxías (redes sociais, comercio electrónico…).
De
falarmos de vantaxes, cómpre salientar a estratexia personalizada e
a especialización de cada unha das oficinas segundo os sectores máis
introducidos no tecido empresarial de cada territorio.
Lembrar
que nas oficinas de SmartPEME do Porriño, Cambados, Pontevedra,
Lalín, Ponteareas e Vigo estanse a pór en marcha as seguintes
actividades: itinerarios de obradoiros temáticos adaptados ás
necesidades das empresas, eventos de networking trimestrais,
colaboración con asociacións e promoción de alianzas
institucionais, especialización sectorial dos asesores e asesoras,
kits de asesoramento en novas tecnoloxías a emprendedores,
identificación e difusión das necesidades TIC aos provedores de
solucións para as PEME e impulso de novas carteiras de servizos de
asesoramento.
Alén
disto, SmartPEME, que serve tamén de punto de unión cos concellos,
ofrece axudas ás PEME e persoas emprendedoras e autónomas en
aspectos como a elección do market place máis axeitado, un
acompañamento durante o proceso de introdución do comercio
electrónico, consellos sobre as ferramentas axeitadas para mellorar
a produtividade e a resolución das dúbidas sobre as TIC que poidan
ter estas persoas.