Tecnoloxía libre de supercomputación para empresas galegas e portuguesas do sector metalúrxico
luns, 19 de decembro do 2011
A supercomputación e as súas vantaxes (ese
potencial para resolver operacións de cálculo, empresariais ou científicas, que
sen contar con grandes ordenadores ou con ordenadores en liña non poderían ser
posíbeis) van estar máis preto do noso sector produtivo industrial. Máis polo
miúdo, dos sectores metalmecánico e metalúrxico de Galicia e o Norte de
Portugal, que son nos que se insiren as empresas integrantes da Asociación de
Investigación Metalúrxica do Noroeste (AIMEN) e a Associaçao de Industriais Metalúrxicos
e Metalomecánicos de Portugal, AIMMAP. As devanditas plataformas, xunto co
Centro de Apoio Tecnolóxico á Industria Metalomecánica, CATIM, e grazas á
tecnoloxía do Centro de Supercomputación de Galicia, CESGA, terán ao seu
alcance tecnoloxías libres e avanzadas de deseño, enxeñaría e simulación por
computador.
O obxectivo, segundo informa o CESGA
nun comunicado, é impulsar a innovación nas pequenas e medianas empresas de
ámbalas beiras do Miño.
Cómpre ter en conta, engade o centro emprazado
no Campus Sur de Santiago, que as empresas usan cada vez máis modelización e
simulación co fin de aumentar as súas vantaxes competitivas. Deste xeito, “CESGA, AIMEN, CATIM E AIMMAP uniron forzas para
facilitar a través deste proxecto, o acceso a software de simulación de código
libre e capacidade adicional de computación”, infórmase.
O Proxecto
CloudPEME, que é como se chama esta iniciativa, supón que as pequenas e
medianas industrias manufactureiras teñan á súa disposición unha serie de
tecnoloxías avanzadas e coñecementos técnicos de vangarda. Máis polo miúdo, “axudará ás firmas galegas e do Norte de
Portugal a ter acceso ferramentas que realmente poidan impulsar a innovación
nos seus procesos e produtos”.
O fin último do proxecto é dotar ás empresas
do coñecemento; facilitarlles o acceso a ferramentas de simulación sen custo de
licenza que lles permitan mellorar os seus produtos con maior eficacia, a menor
custo e nun tempo reducido; e proporcionais unha plataforma de soporte para a
súa utilización. O custo total do proxecto é de 417.280, dos que o 75% está
financiado con fondos FEDER a través da segunda convocatoria do Programa
Operativo de Cooperación Transfronteiriza España - Portugal 2007-2013 POCTEP.