Tecnópole organiza unha conferencia sobre coaching para o emprendemento e a innovación
mércores, 9 de maio do 2012
- Exemplo de sala de coworking, vista en raulpiriz.wordpress.com
A Tecnópole-Parque Tecnolóxico de
Galicia está a organizar una conferencia sobre coaching para o emprendemento e a innovación, que celebrará o
vindeiro venres, 25 de maio, con motivo da estrea dun novo espazo de traballo nas
súas instalacións, dende o que ofrecerá servizos orientados a profesionais autónomos.
Trátase dunha nova sala de coworking
na que se ofrecerán ferramentas de traballo e apoio adaptadas especificamente
ás necesidades dos autónomos e emprendedores, e tanto o novo espazo como a
conferencia que terá lugar na súa inauguración, foron postas en marcha no marco
do 20º aniversario da Tecnópole.
A conferencia, que será impartida por Thinkin’’ Coaching en horario de
mañá, presentará aos asistentes as vantaxes desta actividade como un proceso
creativo útil para o desenvolvemento das competencias persoais e profesionais, facendo
especial fincapé na súa capacidade para potenciar as aptitudes e habilidades
relacionadas co emprendemento e a innovación.
Tal e como informan dende a Tecnópole, o coaching é un proceso de axuda orientado á consecución de
obxectivos “que non consiste en que o
coach transmita coñecementos ao participante, senón que, mediante o uso de
competencias como a escoita activa e a pregunta, consiga provocar que este
atope as súas propias solucións das que até ese momento non era consciente, en
forma de accións para alcanzar o obxectivo que pretende”. “Neste caso”, engaden, “os obxectivos serán dous: emprender e innovar”.
A conferencia vai dirixida, fundamentalmente, a directivos, emprendedores
e persoas con ideas innovadoras que desexan para sacar adiante o seu proxecto
empresarial ou ben establecer novos plans de negocio nas súas organizacións.
A xornada é totalmente de balde porén aquelas persoas que queiran
participar voluntariamente nunha campaña de recollida de xoguetes para os nenos
máis desfavorecidos na que colabora a Tecnópole, poden facelo entregando un
xoguete a cambio da inscrición.
O prazo para rexistrarse na xornada xa está aberto e poder formalizarse
enviando os datos de contacto da persoa asistente a conferencias@thinkincoaching.com.