Telefónica amosa no Mobile World Congress o potencial de integrar Wi-Fi con 4G
mércores, 27 de febreiro do 2013
- César Alierta, presidente de Telefónica, na súa intervención no salón Mobile World Congress /Imaxe de El Periódico
Como non podía ser
doutro xeito (tendo en conta o ritmo que leva a operadora Telefónica
de presentación de desenvolvementos, acordos e servizos novos),
entre as cousas que se poden ver estes días en Barcelona, nesa gran
bóla de cristal sobre o futuro das telecomunicacións que é o
Mobile World Congress,
tamén hai cousas da
operadora española. Por exemplo unha presentación en detalle
dos resultados das súas máis recentes experiencias de voz sobre
tecnoloxía LET e na integración de Wi-Fi como un complemento máis
da rede móbil. Isto último insírese no seu obxectivo de amosar a
integración completa da dita tecnoloxía de acceso sen fíos nunha
rede 4G.
Esta disposición de
Wi-Fi na rede celular podería estar ao alcance da man dos clientes o
ano vindeiro, permitindo entre outras cousas que os usuarios de
smartphones e tablets muden a tecnoloxía móbil 3G a
outra Wi-Fi e coa vantaxe dun “cambio imperceptíbel e sen que
se perda cobertura”, informa a operadora dende o salón de
Barcelona. Estamos, di, xusto no limiar da porta que nos dá acceso a
un gran abano de servizos multimedia de última xeración. Unha boa
parte disto sostense na confianza de Telefónica con respecto á
devandita tecnoloxía sen fíos, até o de agora moi empregada para
estender o brazo das redes (por así dicilo, incrementar músculo),
pero pouco explotada como recurso único e prioritario (non un
complemento). Telefónica afirma que o valor real desta rede “verase
cando estea integrada ao con por cen nas tecnoloxías móbiles
baseadas no 3GPP, Proxecto Asociación de Terceira Xeración”.
E engade: “A nova tecnoloxía Wi-Fi que se empregará na
implantación de redes móbiles pasou ao terceiro nivel de operador,
o que significa que ofrece os últimos avances e prestacións,
ademais dun rendemento semellante ao do LTE, e permite ademais o
roaming entre varios operadores e países”.