Telefónica e Citrix queren espallar a nube empresarial con Virtual Dekstop
mércores, 28 de outubro do 2015
Telefónica e Citrix están a amosar os froitos do
seu traballo conxunto en materia de servizos na nube para as
empresas. Máis polo miúdo, a súa cooperación recente deu como
resultado un recurso para facilitar aos clientes a virtualización do
seu posto de traballo na nube. Ou sexa: a posibilidade certa de
levaren a cabo labores cotiáns de calquera índole dende calquera
lugar e calquera computador. Trátase do servizo Virtual
Desktop e virtualiza,
sinalan Telefónica e Citrix, aplicacións
de negocio e escritorios Windows completos. En detalle, engaden,
o servizo “crea unha contorna de traballo accesíbel dende calquera
dispositivo, totalmente segura e con capacidade para achegar unha
experiencia de usuario máis sinxela e sen interrupcións”.
Polo tanto, a
idea é simplificar a xestión e axilizar os procesos das empresas
que teñan unha cifra alta de empregados ou ben un espallamento
considerábel das súas sedes. Para este tipo de firmas, Virtual
Dekstop fornece o despregamento de escritorios, a
actualización ou migración do software e do sistema operativo así
como a habilitación de aplicacións, de maneira masiva; “aforrando
tempo e custos ás devanditas compañías”, engaden Citrix e
Telefónica, que tamén salienta que o servizo amplía as opcións a
nivel de xestión de dispositivos nas organizacións, entre outras
cousas porque “aloxar as aplicacións e escritorios na nube supón
desligar a información do dispositivo de traballo”. En
consecuencia, redúcense os labores a realizar polos equipos
informáticos e móbiles e alóngase o seu ciclo de vida.