Telefónica e Saluspot xuntan forzas para democratizar a eSaúde en Latinoamérica
venres, 21 de febreiro do 2014
- Benjamin Niddam, co-fundador de Saluspot
Telefónica
Dixital e Saluspot
(comunidade dixital de eSaúde integrada por médicos e pacientes)
veñen de xuntar forzas para impulsar estratexias conxuntas en
materia de tecnoloxías aplicadas no eido da medicina, a atención,
os coidados e o seguimento das persoas doentes ou dependentes. Para a
operadora, o acordo é “o máis importante até a data no que se
refire a saúde dixital no sector consumo e en termos de alcance
global e número de usuarios”. Para Saluspot, a alianza vaille dar
azos ao seu proceso de medre, un espallamento que abrangue América
Latina e que se apoiará na experiencia en presenza de Telefónica
alén do Atlántico (onde conta xa con máis de dous millóns de
clientes de servizos dixitais de saúde).
Para a operadora, o
acordo do que estamos a falar, “fortalece o seu catálogo de
servizos en materia de eSaúde e a súa aposta por converterse en
actor crave neste terreo”. Segundo as dúas partes implicadas na
alianza, está claro que é preciso clarificar cousas na Rede,
simplificar servizos e sobre todo pór un pouco de orde. Segundo
apunta Telefónica, “a fiabilidade da información médica en
Internet, malia a demanda que experimenta, atravesa un intre
delicado”. De feito, sinala a compañía, a Rede reborda de fontes
anónimas que divulgan contidos de saúde de aparencia útil e
relevante, sendo imposíbel para o usuario saber a ciencia certa se o
que ten diante é gran ou palla. Neste punto, incide a operadora, é
onde entra en xogo Saluspot, unha comunidade onde os usuarios de
servizos dixitais ligados á medicina, e os propios facultativos,
achegan as súas opinións directas sobre múltiples cuestións.
“Estamos polo tanto”, informan, “ante unha información
sanitaria fiábel e de calidade que evita que o usuario siga
consellos de fontes non autorizadas que poidan pór en risco a súa
saúde”. Isto é especialmente relevante en Latinoamérica, onde
“existe un importante segmento de poboación cun acceso limitado ao
sistema sanitario”. Saluspot, neste senso, lembrou na sinatura do
acordo con Telefónica que o seu cometido é e será facilitar a
democratización da saúde, subministrando acceso ao consello dun
profesional colexiado e de balde, “acceso que para parte da
poboación non sería posíbel doutra forma”.