Telefónica quere chegar aos 4 millóns de clientes ao abeiro de Fusión TV
venres, 6 de febreiro do 2015
Entre os retos de
Telefónica para este ano que comeza atópase, como é lóxico, o de
incrementar os ingresos e o número de usuarios dos seus servizos, e
non só os de telefonía móbil. Máis polo miúdo, o que se pretende
é ir alén dos dous millóns de clientes de televisión que arestora
ten no mercado español, sendo
o seu obxectivo chegar a rentes dos 4 millóns ao remate de 2015 a
través de Fusión TV. Para dobrar a carteira de usuarios
Telefónica tirará partido das posibilidades de Canal +,
recentemente adquirida e doutras cousas como a inclusión de Movistar
TV en aparellos de televisión Samsung (o que significa que boa parte
das Smart TV do fabricante terán acceso directo ao servizo de
Movistar sen necesidade de aparellos extra, isto será unha realidade
logo do inverno).
Outra das estratexias a
seguir para acadar a devandita cifra de usuarios será minimizar a
porcentaxe de cancelación de contratos. Segundo se informa, a
operadora apostará de cheo pola liña Fusión e, polo tanto, polo
converxente. Isto levarase a cabo en base a o seguinte feito: quen
ten servizos converxentes troca menos de operadora (para facelo,
tería que darse unha causa de forza maior, do tipo dunha eiva
técnica grave ou unha atención incorrecta).
En definitiva, a
operadora quere ir levando a súa carteira de usuarios cara ao
servizo Fusión. Como lembraremos, este proceso xa foi acadando fitos
importantes, como
por exemplo a migración dos clientes de ADSL a fibra óptica,
novidade abeirada ao catálogo Fusión e anunciada en abril do ano
pasado.Esta migración, que foi de balde, posibilitou un acceso de 10
Mbps reais sobre a rede fixa “máis rápida e potente no mercado”,
engadiu a operadora, “amais de optar a máis e mellores produtos
converxentes, sempre con televisión e 4G, polo mesmo prezo e mesmo
menos do que viñan pagando con anterioridade”.