Televés amosa o seu concepto de fogar conectado no salón xermano da banda larga, ANGACOM
mércores, 29 de maio do 2013
A empresa compostelá
Televés vén de confirmar que
participará un un ano máis en ANGACOM (antiga ANGA Cable), unha
das grandes citas europeas (probablemente a máis imporante) dos
sectores produtivos ligados ao cable, o satélite e a banda larga (a
celebrar do 4 ao 6 de xuño en Köln,
Alemaña). Desta volta, a compañía amosará en detalle os
seus máis recentes achados en materia de fogar dixital, facendo
fincapé nunha consola de seu desde a que se controla toda unha
diversidade de servizos adaptados ás necesidades particulares de
cada usuario.
Sobre este concepto,
informa Televés, dedicarase especial atención ás aplicacións da
dita consola, destacándose unha aplicación de prevención
socio-sanitaria desenvolvida para atender as necesidades de persoas
maiores e permitirlles levar unha vida independente.
Televés amosará tamén
os seus últimos produtos e solucións para os instaladores e
integradores profesionais de telecomunicacións, así como para os
operadores de redes. En particular, na caseta da compañía en
ANGACOM “os visitantes poderán coñecer de primeira man o novo
medidor de campo portátil H30, que reúne nun formato compacto as
mellores prestacións para a certificación de instalacións”.
Asemade, exporanse os novos módulos para cabeceiras de distribución
T.0X, desenvolvidos para o remultiplexado de servizos tanto en
modulación DVBS2 como DVBT2.