Televés confírmase como a entidade galega coa maior capacidade innovadora do seu sector
mércores, 20 de xuño do 2012
A firma compostelá de telecomunicacións, Televés, vén
de facer reconto das patentes que leva presentadas dende o ano 2000 ata a
actualidade, e a cifra ascende a 40 solicitudes de patentes e 19 modelos de
utilidade, o que a confirma como “a
compañía de meirande capacidade innovadora no seu sector”, segundo afirmou
o seu equipo responsable, que engadiu que “é
ademais a entidade privada galega con máis invencións presentadas ante a
Oficina Española de Patentes e Marcas”.
As
patentes presentadas por Televés no período comprendido entre o ano 2000 e a
primeira metade de 2012 abarcan invencións en materia de antenas, transmisión
de imaxe, difusión (broadcast),
transmisión de información dixital, comunicacións telefónicas, circuítos
impresos, control de amplificación e sintonización de circuítos resoantes, o
que representa unha boa mostra de que a actividade innovadora da compañía
mantívose constante ao longo dos últimos doce anos.
Asemade,
segundo informan, obtiveron “récords
anuais de patentes en 2001 e 2006”, anos nos que rexistraron sete
solicitudes; así como un pico de cinco
modelos de utilidade no ano 2010.
O 62% das
solicitudes de patentes e modelos de utilidade din que foron rexistrados en
España, mentres que un 18% xestionouse a través da Oficina Europea de Patentes,
que se suman ás que a compañía presentou en Alemaña e Portugal.
A clave
da compañía para ser un “actor da
vangarda no cambio tecnolóxico no mundo da televisión” din estar
directamente asociada “ao seu forte investimento
en I+D+i”, a través dunha unidade de Investigación, Desenvolvemento e
Innovación de seu, creada no ano 1971 e na que traballan actualmente máis de 60
profesionais.
O investimento
da compañía galega en I+D+i no 2001 superou os 8 millóns de euros.