Tourist Inside II dotará media ducia de oficinas turísticas de Pontevedra dunha ferramenta para xestionar o fluxo de persoas
mércores, 20 de setembro do 2023
Segue
adiante o programa Tourist Inside II, impulsado pola
Deputación de Pontevedra para facilitar a transformación dixital do
destino Rías Baixas. Desta volta iniciáronse dúas novas
iniciativas. A primeira consiste en dotar seis oficinas de
información turística da provincia dunha ferramenta para xestionar
o fluxo de persoas e controlar a capacidade. A segundo será un curso
en liña para formar o persoal das oficinas na xestión de destinos
turísticos intelixentes. Ambas as dúas medidas suporán un
investimento de 36.000 euros.
No referido á ferramenta de xestión do fluxo de
persoas e control da capacidade e distanciamento social nas oficinas
adheridas á rede Info Rías Baixas, beneficiaranse o palacete das
Mendoza (sede central e punto de información de Turismo Rías Baixas
en Pontevedra) e outros cinco puntos dos 32 que compoñen a rede,
concretamente as oficinas turísticas dos concellos de Baiona,
Mondariz-Balneario, Redondela, Sanxenxo e Tui, todas elas cunha
superficie de máis de 50 m2. A plataforma e os dispositivos
asociados permitiranlle á Deputación “obter información
estratéxica e operativa para avanzar na mellora dos servizos que
presta actualmente a rede”. Os datos, que se obterán en tempo real
e con alta precisión, permitirán unha xestión máis intelixente e
mellorada para darlles un mellor servizo ás persoas visitantes.
En canto á formación que recibirá o persoal das
oficinas, trátase dun curso en liña de 40 horas de duración que
permitirá responder á demanda de formación das e dos técnicos
turísticos municipais do destino Rías Baixas no eido da xestión
intelixente. O programa teórico-práctico permitiralles coñecer os
principais conceptos do modelo de Destino Turístico Intelixente
(DTI) para axudar a que a provincia de Pontevedra se converta nun
espazo innovador e xerador de intelixencia turística.
Como dixemos,
Tourist Inside II é un programa da Deputación de
Pontevedra que busca avanzar na transformación dixital da provincia
de Pontevedra como DTI, para mellorar a eficiencia enerxética e
mediante a vixilancia tecnolóxica asociada á actividade turística
da provincia. O programa está financiado cos fondos Next Generation
da UE, polo programa de axudas á transformación dixital e
modernización das entidades locais que forman parte da Rede de
Destinos Turísticos Intelixentes.