Turgalicia leva as vantaxes das TIC ao empresariado das catro provincias galegas
venres, 19 de novembro do 2010
Na súa teima por
ofrecerlle aos empresarios e empresarias do sector turístico do noso país as
ferramentas necesarias para mellorar a súa promoción e comercialización a través
de Internet, Turgalicia, en colaboración coas tres principais entidades
empresariais do sector (Fegatur, Agatur e Pazos de Galicia), vai organizar
unhas xornadas nas catro provincias galegas, nas que dará a coñecer as vantaxes
das TIC aplicadas á empresa turística.
Estas xornadas, que levan
por nome Turis-Tic, pretenden dar solucións ao que actualmente, segundo
informan dende Turgalicia, “máis lle
preocupa aos propietarios galegos de establecementos turísticos”; que é “como vender en Internet?” e “se o están a facer ben”.
Cada provincia galega dará
acollida a unha xornada que terán lugar nas seguintes cidades: o día 30 de
novembro en Santiago de Compostela; o 2 de decembro en Allariz; o 13 de
decembro en Lugo e o 15 do mesmo mes en Moraña.
Todas elas darán comezo ás
10:00 horas e rematarán ás 19:00 horas, dividíndose en dúas partes ben
diferenciadas: a mañá dedicada á comercialización, na que se darán as claves e
conceptos básicos que calquera empresa ten que ter presentes se quere dar o
paso para un bo uso da Rede; e a tarde dedicada á auditoría de impacto, na que
os responsables de destacadas empresas de todo o Estado analizarán a presenza
en Internet das empresas asistentes ao seminario, que serán seleccionadas
aleatoriamente.
A xornada da capital
galega estará aberta a calquera empresa do sector turístico que queira asistir
sen custo algún e nas outras tres, as empresas que non estean asociadas a
Fegatur, Agatur ou Pazos de Galicia, terán que pagar 35 euros, que inclúen o xantar.
Para incribirse, as persoas
interesadas deberán entrar na web oficial das xornadas ou ben chamar
ao teléfono 902 233 131.
O programa, que se pode
consultar ao detalle na devandita web, inclúe os relatorios, Como me vendo?, da man de Manuel Pan,
consultor especialista en Turismo e TIC e Como
me organizo para vender?, por Rafael Pintado de Ruralgest nunhas xornadas e
por Susana Alvite noutras.