Turismo de Vigo renova a súa web e impúlsase nas redes sociais
venres, 4 de xaneiro do 2013
Turismo de Vigo xa conta
dende os días pasados con
nova web: unha xanela ao mundo da maior das cidades galegas á
que se lle acaba de sacar brillo e despoxar de todo aquilo que pode
afectar negativamente á vista de todo o que nos ofrecen o seu casco
urbano e arredores, o seu valioso patrimonio arquitectónico e a non
menos importante riqueza natural (comezando polas Illas Cíes). A
páxina renovada, achegada en catro linguas (castelán, galego,
inglés e portugués), compleméntase cun importante traballo de
relanzamento de Vigo no ámbito 2.0, que se traduce, para
entendérmonos, en novos sitios nas redes sociais: en Facebook,
en Twitter, en
Pinterest, en
YouTube e en
Google
Plus.
Asemade, tamén hai
presenza na revista dixital Isuu. Este traballo de posta ao día
foi desenvolvido pola empresa galega Esmerarte
para a Concellería de Turismo, Comercio e PEME do Concello de Vigo e
forma parte do Plan de Competitividade de Turismo urbano e da Ría de
Vigo froito da colaboración entre o Goberno local, o Instituto de
Turismo de España, a Xunta e a Federación Provincial de Empresarios
de Hostalería de Pontevedra. A presentación da renovada web e da
vertente 2.0 da cidade galega compleméntase cun vídeo específico,
á vista xa na Rede.
Entre as novidades que
pon en xogo a nova web atopamos as seguintes:
· A reestruturación da
información: fíxose fincapé en mellorar ao máximo o xeito en que
se amosan os contidos, co obxectivo de engaiolar ao usuario e
potenciar o seu interese acerca da cidade de Vigo, salientándose as
súas características únicas e diferenciadoras.
· Xeolocalización dos
principais puntos de interese que se expoñen no portal, todo a
través de Google Maps. Entre outras cousas, achéganse aos
internautas todo tipo de suxestións (aparcamentos, monumentos,
centros comerciais, áreas naturais), con referencia ao lugar no que
se atopa ou vai atopar, co fin de que poida organizar os seus propios
itinerarios na cidade.
· A
web incorpora información actualizada sobre recursos de interese
para o turista, como aloxamento, restauración, comercio e empresas
de servizos de lecer (aluguer de vehículos, compañías navieiras,
clubs deportivos, empresas de aventura, etc.). Os elementos están,
como dixemos, xeolocalizados, de maneira que o usuario pode filtrar a
súa procura por tipo de establecemento, por localización ou por
categoría, e dispor da vista en formato mapa ou ben en formato
listaxe destes recursos.
·
A través de ferramentas como Vigo
á túa medida e
Que
facer en Vigo,
permítese ao usuario explorar contidos escolmados de maneira
específica para as súas necesidades e características. Outras
ferramentas, como Tamén
pódeche interesar
clasifican manualmente contidos para realizar suxestións ao usuario
en función do elemento que está a consultar. Deste xeito, informa
Esmerarte, amplíase o espectro de activos que se amosan ao usuario
para captar a súa atención e eventualmente pode contribuír ao
incremento do tempo de permanencia na páxina. Pistas
e recomendacións
é unha utilidade que quere achegar o contido ao destino ofrecendo
consellos prácticos, atallos ou propostas dirixidos a mellorar a
experiencia do viaxeiro, “coma
se un vigués acompañáselle no seu itinerario”,
informan os responsábeis destas iniciativas.