TweetDeck permite compartir contas de Twitter sen divulgar os seus contrasinais
luns, 23 de febreiro do 2015
Para facilitar o uso dunha mesma conta de usuario de Twitter
por varias persoas presentan
TweetDeck Teams, un novo xeito de compartir contas de usuario sen ter que
compartir os seus correspondentes contrasinais empregando a aplicación TweetDeck
(propiedade de Twitter) nas súas versións para web, Chrome e Windows.
Esta nova funcionalidade é moi sinxela, e supón un grande incentivo para
empregar o noso nome de usuario e contrasinal de Twitter para identificarnos en
TweetDeck, xa que, de facer tal, poderemos gozar de TweetDeck Teams. Para iso,
cando iniciemos unha sesión de TweetDeck con acceso á conta que queiramos
compartir, só teremos que ir á sección de Contas, picar no apartado de Equipo e
logo escribir os nomes de usuarios que queiramos asignar, para elixir logo se
queremos darlles o rol de colaboradores ou de administradores (estes últimos
poderán xestionar a listaxe de usuarios autorizados).
Cómpre destacar que nin administradores nin colaboradores poden acceder ás
contas de Twitter fóra de TweetDeck, de xeito que non poderán mudar a
configuración dunha conta ou o seu contrasinal, o que engade un nivel de
seguridade moi interesante para as xestións conxuntas de contas de usuario.
VÃdeo explicativo do funcionamento de TweetDeck Teams