UNVEX impulsará con 120 relatores e 60 expositores o noso talento en deseño de drons
martes, 8 de xuño do 2021
O
evento UNVEX, referente estatal e
internacional no ámbito dos drons e as tecnoloxías que os
acompañan, vai celebrar a súa vindeira edición en Santiago de
Compostela, en Marín e nas Rozas (Lugo) entre os días 7 e 9 de
xullo. Segundo se fixo saber este 8 de xuño na Cidade da Cultura
(ante a prensa e os representantes da industria galega e española) o
obxectivo é impulsar dende aquí a industria dos vehículos aéreos
non tripulados, un sector que xerará 1.200 millóns de euros en
2035. Tamén se fixo fincapé nas cifras que acompañan o programa:
120 relatores, 22 sesións e 60 expositores.
O
director de UNVEX, Ángel Macho, agradeceu á Xunta de Galicia a súa
colaboración e apoio neste ano e medio de preparación do evento e
destacou a importancia que adquire Galicia nesta edición: “Desde o
primeiro momento que coñecemos á Axencia Galega de Innovación
(GAIN) soubemos que eramos complementarios e fixamos os obxectivos
para deseñar esta edición”, comentou.
- Patricia Argerey, directora de GAIN, na presentación de UNVEX 2021
Pola
súa banda, a directora de GAIN, Patricia Argerey, salientou que
UNVEX “servirá para mostrar todo o potencial de Galicia neste
sector e profundar nun modelo económico baseado no coñecemento e no
I+D”. Tamén lembrou que a Xunta traballa dende hai anos para
converterse en referente da industrial aeroespacial, baseada
especialmente nos UAV, cousa que ratificou co seu Plan Estratéxico
2021-2025, “co que se mobilizarán 70 millóns de euros públicos
que aspiramos que entre fondos privados e europeos ascendan a 540
millóns de euros”, sinalou.
Tras
estas intervencións, foi a quenda de debullar o programa de
conferencias, da man do seu coordinador, Carlos Delgado, que anunciou
que UNVEX contará con 120 relatores en 22 sesións que se organizan
por bloques sobre Aplicacións públicas e usos comerciais,
que centrarán as conferencias do primeiro día; sendo a temática
Defensa, Seguridade e Emerxencias a cuestión que vertebre a
segunda xornada. O evento rematará cunha sesión de divulgación,
aberta ao público, durante a mañá do día 9 de xullo.
Máis
de 60 expositores
UNVEX
2021 ten confirmados máis de 60 empresas expositoras nas súas máis
de 2.5000 metros cadrados de exposición, entre os que destacan as
empresas tractores do sector, así como pequenas e medianas empresas
e operadoras. Nesta exhibición poderanse ver as principais as
principais novidades tecnolóxicas destas empresas e tamén contará
co seu propio programa de actividades con conferencias no espazo
“Ágora” e as conferencias de divulgación do día 9 de xullo.
Demostracións
marítimas e aéreas
No
apartado das exhibicións, o responsábel das demostracións
marítimas, que se celebrarán na tarde do 8 de xullo na Escola Naval
Militar de Marín (Pontevedra), o vicealmirante Gregorio Bueno,
explicou que se poderán ver catro sistemas de superficie e un
sistema aéreo deseñado especificamente para operar directamente
desde embarcacións.
O
día 9 de xullo, UNVEX desprázase ao Centro de Investigación
Aerotransportada de Rozas (CIAR), situado no aeródromo de Rozas
(Lugo) no que se poderán ver en vivo oito sistemas de á fixa e á
rotatoria e un sistema contra UAS, así como as súas prestacións,
como detallou o seu director técnico, Carlos Albo.
A
directora do CIAR, Neves Seoane, destacou a importancia de que UNVEX
faga as demostracións nas súas instalacións, para mostrar ás
institucións e ás empresas todo o que este centro, que é un
referente na certificación de avións non tripulados, pode
ofrecerlles.