USC e Concello de Lugo unen forzas para desenvolver o eido formativo de Muralla Dixital
luns, 16 de xullo do 2012
- Pedro García Herradón (esquerda) e Clemente López Orozco, durante a sinatura do convenio de colaboración entre a USC e o Concello de Lugo para o proxecto Muralla Dixital
O vicerreitor de Coordinación e Planificación do Campus de Lugo, Pedro
García Herradón, foi o representante da USC encargado de asinar co Concello de
Lugo un convenio de colaboración para o desenvolvemento
das actividades formativas do proxecto Muralla
Dixital, polo que ámbalas dúas entidades se comprometen a potenciar o
patrimonio da cidade poñendo en xogo as TIC, a través da formación de mozos e
mozas interesados.
Máis polo miúdo, o que se trata é usar as novas tecnoloxías e as técnicas
máis innovadoras para trasladar o patrimonio da cidade da muralla á Rede,
facendo así posible que se coñeza o seu potencial e beleza alén das nosas
fronteiras.
Para iso, no marco deste proxecto, levaranse a cabo unha serie de
obradoiros de formación TIC, que se
estenderán ao longo de cinco meses, e que van dirixidos a mozos e mozas en
situación de desemprego con titulacións en Humanidades, Historia, Historia da
Arte ou Belas Artes.
Os obradoiros a celebrar versarán sobre dixitalización do patrimonio
documental lucense e dixitalización 3D, fotografía dixital e modelado en 3D do
patrimonio histórico-arqueolóxico; e cada un deles contará con oito
participantes.
Segundo informan os seus responsables, “os
obradoiros terán un claro compoñente práctico” e centraranse inicialmente
no manexo de diferentes ferramentas tecnolóxicas de rexistro, documentación e
difusión do propio patrimonio histórico-arqueolóxico lucense.