Un profesor da UDC recibe unha bolsa de 1,5 millóns para un proxecto que amplía a comprensión dos computadores
venres, 2 de setembro do 2016
Carlos
Gómez, profesor da Universidade da Coruña, vén de acadar unha
bolsa de investigación europea de 1,5 millóns de euros. Trátase
da bolsa Starting Grant, achegada
a través do European Research Council (ERC) e dirixida a
servir de apoio e alicerce orzamentario para o desenvolvemento (ao
longo dos cinco anos vindeiros) do proxecto FASTPARSE (Análise
sintáctica rápida de linguaxe natural para procesado a gran
escala), unha sólida proposta tecnolóxica cuxo obxectivo último
é facilitar ao máximo a comunicación cos computadores e a súa
capacidade de comprensión.
O reitor da Universidade da Coruña,
Julio Abalde, o vicerreitor de Investigación e Transferencia,
Salvador Naya, e o propio investigador, Carlos Gómez, ademais do
xestor de Relacións Científico-Tecnolóxicas da UDC, Xavier Alcalá,
presentaron este venres 2 de setembro os detalles da concesión e do
proxecto. A cita foi no sala de prensa da Reitoría (A Maestranza).
Segundo fixeron saber, a Universidade da Coruña suma esta nova
Starting Grant á concedida en 2012 ao profesor da Escola
Técnica Superior de Enxeñaría de Camiños, Canais e Portos Héctor
Gómez Díaz.
Carlos Gómez pertence ao Departamento
de Computación, na área de coñecemento de Ciencia da Computación
e Intelixencia Artificial e imparte docencia nas facultades de
Informática e Filoloxía.
Proxecto FASTPARSE
Segundo se fixo saber na presentación,
o devandito proxecto está “na fronteira entre a informática e a
intelixencia artificial coa lingüística e baséase na incorporación
da análise sintáctica ás funcións dos ordenadores de forma moi
rápida”. O investigador engadiu que o seu traballo xira en boa
medida arredor de permitir que os computadores entendan de verdade
cal é o suxeito e cal e o obxecto dunha determinada frase, “algo
que os humanos facemos de maneira intuitiva pero que os equipos
informáticos aínda non son quen de facer de xeito eficaz”.
Carlos Gómez, profesor das facultades
de Informática e de Filoloxía, sinalou tamén que “incorporar a
análise sintáctica de forma que os ordenadores fagan moi rápido
ese proceso abre moitos eidos de aplicación, como ter unha nova
xeración de buscadores que atopen a información de xeito
intelixente e analítico, saber analizar en tempo real todas as
conversas que se produzan nas redes sociais con relación a unha
determinada busca (sen necesidade de hashtags por exemplo, no
caso de Twitter) ou acadar a tradución simultánea”.
O proxecto, explicou, terá tres liñas
de investigación: optimización informática, características
lingüísticas dos idiomas humanos e modelos cognitivos. O
investigador, que confesou estar “moi motivado e con moitas ganas
de traballar duro neste proxecto”, desenvolverá o seu traballo na
Universidade da Coruña para o cal contratará a cinco persoas, das
que catro serán investigadoras.