Unha ducia de empresas innovadoras preseleccionadas xa para os Premios Galicia Spin-Off
venres, 23 de outubro do 2015
Os
Premios
Galicia Spin-Off, organizados por Banco Pastor (Grupo Banco Popular)
e o portal galego de divulgación científico-tecnolóxica Gciencia,
xa teñen finalistas. Trátase dunha ducia de firmas
“pertencentes aos máis diversos sectores produtivos”, como por
exemplo a creación de software innovador, a eSaúde, a
agroalimentación ou a achega de produtos innovadores procedentes do
mar. Todas elas competirán na elección final das gañadoras dos
ditos premios, que se dirixen a salientar as mellores iniciativas
empresariais xurdidas nos grupos de traballo de traballo das nosas
tres universidades (o que se coñece como spin-offs).
Segundo
informan os organizadores do certame, o xurado xa se atopa arestora
deliberando sobre o potencial de cada firma participante (alto en
calquera dos casos) e os destinatarios finais dos galardóns. “A
elevada calidade das propostas presentadas”, explican, “fará
complicado o labor do xurado, que comunicará a súa decisión ao
longo do mes de novembro”
As dúas categorías do
premios (Idea Emerxente e Selo de Calidade) recoñecen,
respectivamente, a unha spin-off que irrompese nos últimos
dous anos cunha idea innovadora e a unha empresa sobranceira pola súa
traxectoria de prestixio ao longo dos últimos anos. Ademais,
sinálase, no apartado Idea Emerxente haberá ademais dúas
finalistas que (de igual maneira que a gañadora), terán unha oferta
especial para financiar o seu proxecto innovador por parte de Pastor.
O xurado está composto
por membros do Banco Pastor, do Consello Superior de Investigacións
Científicas (CSIC), da Real Academia Galega das Ciencias (RACGC), da
Secretaría Xeral de Universidades (Xunta de Galicia) e do portal
GCiencia, que se completa co investigador Antonio Figueras, ex
vicepresidente do CSIC e director do Instituto de Investigacións
Mariñas de Vigo. O acto de entrega de premios celebrarase antes de
final de ano nunha cidade a designar. O xurado integra CSIC, Academia
de Ciencias, Secretaría de Universidades, Pastor e Gciencia.