Unha solución do CITIC permite saber en tempo real como se comportan as persoas a través dos seus movementos
venres, 14 de marzo do 2014
Como
son de valiosos para un centro comercial uns datos que lles digan que
expositores ou corredores teñen un maior movemento? Ou que espazos
son menos visitados ou cales son os produtos estrela? E ata, como ha
de entenderse un determinado movemento dunha persoa nunha pista dun
aeroporto? Obter esta información xa é posible grazas a unha
solución de software creada pola Área
Tecnolóxica de Procesado de Imaxes do CITIC. Baseada en técnicas
de investigación en visión artificial e recoñecemento de patróns,
desde o CITIC desenvolveuse unha ferramenta que, mediante o exame de
secuencias, permite analizar en tempo real o comportamento humano e
levar a cabo un seguimento de persoas a partir de vídeos e imaxes.
Esta
solución realiza unha análise automática das secuencias de
movementos a partir de decenas de variables entre as que se inclúen
as traxectorias dos desprazamentos das persoas, as súas velocidades,
como se moven, o tempo que transcorre no caso de deterse... Unha vez
recollidos todos estes datos realízase unha interpretación
automática destas accións en base a un conxunto de regras, polo que
se pode ditaminar o comportamento das persoas a través dos seus
movementos. Ata se poden identificar as distintas partes do corpo de
cada individuo presente na escena.
Aplicacións
múltiples
Polas
características da solución e o fornecemento da información en
tempo real son moitos os sectores nos que pode aplicarse. Manuel F.
González Penedo, investigador principal da Área, explica como pode
ser a súa transferencia a algúns eidos concretos: “O
comercio e a súa extensión ao campo da publicidade ou o visual
merchandising son
sectores onde se ve unha incorporación moi clara. Podemos coñecer
en todo momento como se desprazan os consumidores nun espazo
comercial, onde se deteñen, a que produtos prestan unha maior
atención… Esta información permitiría modificar a distribución
dos mostradores, vitrinas ou estantes para fomentar un aumento das
vendas en función desta información recibida”.
Son
moitas as aplicacións sociais que pode atopar esta solución, xa
sexa en contornas médico-sanitarias (hospitais, centros médicos,
servizos de urxencias, atención á terceira idade) ou en servizos a
implementar nas Smart Cities como a monitorización de
tráfico). “E sen esquecernos da
seguridade. A solución de software desenvolvida detecta calquera
tipo de movemento anómalo de persoas, polo que se de súpeto, nunha
pista dun aeroporto alguén varía a traxectoria habitual saíndose
do estándar, saltaría unha alarma que avisaría automaticamente
desta situación. O mesmo sucedería con puntos determinados coma o
paso por arcos de seguridade”, engade González Penedo.
Na
actualidade o equipo de traballo responsable desta solución,
liderado polo investigador Marcos Ortega Hortas, está a traballar na
incorporación de novas variables á análise. Non só se rexistrará
a traxectoria ou a velocidade do movemento, tamén se valorará como
é ese movemento, amosando se unha persoa se despraza dando saltos ou
se o fai nun punto fixo, unhas novidades que poderían favorecer os
sistemas de seguridade existentes nos centros neurálxicos das
cidades.