Valentín García participou no programa Aulas Dixitais co-impulsado pola Xunta e Coca-Cola
venres, 5 de febreiro do 2021
O
secretario
xeral de Política Lingüística, Valentín García, participou este
venres 5 de febreiro por vídeo-conferencia no programa Aulas
Dixitais de Coca-Cola, incluído na XII edición do Concurso
Novos Talentos de Relato Curto no que colabora a Consellería de
Cultura, Educación e Universidade.
O
responsábel de Política Lingüística da Xunta salientou “a
importancia desta iniciativa que vencella o ámbito escolar ao
sistema literario galego e que contribúe á dinamización da lectura
nas aulas superando as barreiras que nos impón a complexa situación
que vivimos”. O secretario xeral felicitou a Coca-Cola por “manter
o seu compromiso coa promoción do uso da lingua galega no ensino e
achegar ás aulas escritoras e escritores que apostan polo idioma
como ferramenta da súa creatividade artística e literaria”.
Canda
el participaron a xestora de Comunicación de Coca-Cola, Gema
Domínguez, e o escritor Mario Regueira, encargado da primeira sesión
de traballo co profesorado participante.
A
través deste programa, Aulas Dixitais, enmarcado na XII edición do
Concurso Novos Talentos de Relato Curto organizado por Coca-Cola co
apoio da Xunta, a compañía continúa colaborando co profesorado no
obxectivo de plasmar a creatividade do alumnado galego nun relato.
En
total, Aulas Dixitais contou esta primeira semana de febreiro (o
xoves e o venres) cunha vintena de profesores de distintos centros de
ensino galegos.
Os
escritores Rosa Aneiros e Mario Regueira foron os encargados de
dirixir os obradoiros do programa. A sesión do xoves correu a cargo
de Regueira, quen compartiu as estratexias da narrativa nos últimos
50 anos e achegou ao profesorado estratexias para facer os textos
máis atractivos, lúdicos e capaces de mesturarse con outros xéneros
e eidos artísticos. Para rematar, Rosa Aneiros conduciu a sesión do
venres a través de contidos centrados na estimulación lectora e
creativa do alumnado e baseados na súa propia experiencia literaria.