Vedra apoderará mulleres en risco polo vieiro das TIC
venres, 11 de febreiro do 2022
O
Concello de Vedra puxo en marcha unha iniciativa para apoderar á
poboación feminina polo vieiro tecnolóxico: o proxecto Mulleres+. En concreto, o seu obxectivo é “mellorar a posición de mulleres
de grupos vulnerábeis no acceso ao mercado laboral 2.0 e ao sector
tecnolóxico e dixital”.
A
concelleira de Benestar Social, Muller e Igualdade, Susana García
Lema, explica que en setembro pasado tiveron experiencia piloto que
dou moi bos resultados. “Gustaríanos que participaran todas as
mulleres de Vedra, de calquera idade ou condición, xa que se trata
dun programa moi interesante, gratuíto e cuns contidos moi
necesarios tanto a nivel profesional como persoal”, comenta,
engadindo que Mulleres+ non se trata unicamente dun programa
de formación, xa que se busca apoderar ás mulleres e axudalas a
que melloren as súas habilidades sociais, a súa autonomía, a súa
calidade de vida e o seu desenvolvemento persoal.
O
programa iniciarase o 1 de marzo de 2022 e rematará o 26 de xaneiro
do 2023 sendo xullo e agosto meses inhábiles polas dificultades de
asistencia das mulleres usuarias.
Crearanse
dous grupos que traballarán nas aulas do edificio da Estación de
Santa Cruz de Rivadulla e nas Aulas da Terceira Idade de Vedra.
Para
anotarse só é necesario achegarse ao concello ou chamar por
teléfono ao departamento de servizos sociais no 981814693.
Mulleres+
nace a partir dunha realidade do concello de Vedra e doutros
territorios da nosa xeografía: a existencia dunha baixa taxa de
actividade laboral e empresarial feminina. “A falta de formación
en TIC (Tecnoloxías da Información e a Comunicación), entre outras
razóns, aumenta a dificultade á hora de conseguir un posto de
traballo e isto, a súa vez, provoca unha falta de motivación”,
sinalan dende o Concello.
A
partir de esta realidade deséñanse unha serie de puntos nos que
incidir para reverter esta situación, poñendo o foco nos obxectivos
que citamos máis arriba.
O
programa centra a súa actividade nas mulleres en risco de exclusión
e abrangue distintas circunstancias que van desde as vítimas de
violencia de xénero ou de explotación sexual ata inmigrantes ou
emigrantes retornadas. Tamén poden participar reclusas ou ex
reclusas, dependentes en procesos de rehabilitación ou procedentes
de institucións o reeducación de menores.
Mulleres+
artéllase en distintas áreas de contidos vencelladas aos obxectivos
do programa. Na primeira buscarase o coidado propio incidindo na
saúde mental, física e emocional. O seguinte paso será o
apoderamento da muller a partir de actividades destinadas á
inclusión laboral, a autoxestión e a autodeterminación. A terceira
área de acción esta encamiñada á competencia dixital e a
capacitación. Coñecementos básicos sobre TIC, formación teórica
que busque a inclusión dixital, e sesións individuais para
optimizar os coñecementos adquiridos.
Un
das bases máis importantes de todo o programa é a creación de
obxectivos seguindo a metodoloxía Smart. “Búscase
definir metas específicos, medíbeis, alcanzábeis, realistas e
cunha temporalidade establecida que axuden a medir os avances do
programa”, sinala o Concello.