Vitae amósanos metodoloxías para cumprirmos no eCommerce coas expectativas dos usuarios
mércores, 22 de marzo do 2017
Vitae,
consultora galega especializada en formación tecnolóxica de
referencia para os nosos profesionais, anunciou esta semana a
preparación dunha nova actividade de seu moi acaida para todos
aqueles de nós que queiramos facer avanzar os nosos sitios web
comerciais en sinxeleza, efectividade e facilitade de uso. Dito
doutro xeito: trátase dunha oportunidade para adquirirmos recursos
que nos axuden a anticiparnos aos desexos dos clientes e usuarios en
xeral. Este é precisamente un dos grandes obxectivos do seminario
adicado á Experiencia
de Usuario -UX- e Usabilidade en Proxectos Web e eCommerce.
Estamos, en palabras de Vitae, ante a terceira edición dun obradoiro
directamente encamiñado a amosarnos como deseñar e programar
estratexias de usabilidade mediante metodoloxías, técnicas e
ferramentas para cumprir coas expectativas dos usuarios.
Segundo
explica a consultora, o título do seminario ten a súa raizame no
termo “UX Design”, abreviatura de User Experience Design ou,
en galego, Deseño de Experiencia de Usuario. Trátase, para quen
nono o saiba, dunha filosofía de deseño que ten por obxectivo a
creación de produtos que resolvan necesidades concretas dos seus
usuarios finais, conseguindo a maior satisfacción e mellor
experiencia de uso posíbel co mínimo esforzo. En palabras de Dan
Saffer, director de Kicker Studios, UX constitúe “o que o cliente
percibe ao usar ou probar un produto e unha forma de ver estes
produtos de maneira integral desde o punto de vista dun usuario ao
que é probábel que non lle importe como se fan eses produtos, só o
produto en si mesmo”.
Segundo
lembra Vitae, o proceso para o deseño de UX está relacionado con
“comprender e deseñar a experiencia do cliente de principio a fin,
e non só o aspecto estético e as funcionalidades dun sitio”. En
base a isto, os clientes piden algo tanxíbel de contado. Porén,
primeiro é preciso comprender os requirimentos do negocio e as
necesidades daqueles.
O
curso concibido e artellado por Vitae incluirá estratexias en
proxectos web e en proxectos de mobilidade cun enfoque eminentemente
práctico. Os obxectivos son: introducir aos asistentes na
importancia da definición global dun proxecto web desde o punto de
vista do usuario, fornecer metodoloxías para cubrir as expectativas
e as necesidades dos visitantes, e por último, ver as peculiaridades
especiais dos proxectos de comercio electrónico
Vitae
diríxese, desta volta, a programadores, consultores, analistas,
xefes de proxecto, responsábeis de comunidades, especialistas en
posicionamento en buscadores, técnicos de mercadotecnia en liña,
deseñadores e, en liñas xerais, profesionais interesados en ampliar
a súa formación en UX para chegar a ter unha fonda comprensión da
interacción entre persoa e computador.
Lembrar
por último que ademais deste obradoiro, neste segundo trimestre do
2017 Vitae presenta unha ampla oferta formativa centrada en xestión,
habilidades persoais e de operacións: Avaliación Avanzada de
Perfís TI, Xestión de Proxectos Áxiles con SCRUM,
Angular2 ou Desenvolvemento Frontend moderno con React e
Redux.