Vodafone abre a súa nova tenda 2.0 no Centro Comercial Catro Camiños da Coruña
xoves, 23 de xullo do 2015
Vodafone España
inaugurou este mércores a súa “tenda 2.0” na Coruña, emprazada
no local B5 do Centro Comercial Catro Camiños. O novo
establecemento, segundo informa a operadora, insírese no plan de
transformación da canle de distribución da compañía. A idea, da
tenda e do plan por enteiro, é “ofrecer unha experiencia de
cliente diferencial e única no sector das telecomunicacións a
través da transformación do espazo e dos procesos de venda,
atención e asesoramento ao usuario dos nosos servizos”. De igual
xeito que outros establecementos remodelados, o do Centro Comercial
Catro Camiños disporá dun especialista en datos, o que en palabras
de Vodafone coñécese como un “apptualizador”.
Ou sexa, un profesional que configura ao cen por cen os dispositivos
dos clientes antes de saíren da tenda. Esta tamén contará con
servizos de asesoría ao usuario empresarial na súa canle de
distribución.
Segundo informa a
operadora, para facilitarnos a experiencia “dunha visita activa”
no novo establecemento coruñés, creouse un espazo máis amplo sen
barreiras nin mostradores, con máis iluminación e mobiliario
natural que permite “un trato máis próximo, directo e
personalizado cos clientes”. Este compromiso coa accesibilidade e
coa eliminación de todo aquilo que se poida interpoñer entre o
visitante e os profesionais da empresa responde a unha arela xeral de
Vodafone aplicábel a todos os seus puntos de venda 2.0. Neles (e no
da Coruña tamén) o deseño diríxese a facilitar “unha
experiencia dinámica na que o cliente poida interactuar de xeito
real con máis de trinta dispositivos, introducíndose tamén un novo
sistema de xestión de fluxos de usuarios que reduce o tempo que
pasan na tenda”.
O plan de transformación
da canle de distribución de Vodafone España, anunciado en setembro
de 2013, abranguerá 453 puntos de venda antes de marzo de 2017, e
supón un investimento de máis de 105 millóns de euros. Esta
iniciativa, como dixemos, enmárcase nun dos alicerces da estratexia
da operadora a tres anos: construír unha experiencia “de cliente
diferencial e única no sector das telecomunicacións” a través da
transformación do espazo e dos procesos de venda, atención e
asesoramento. A 31 de marzo, transformáronse máis de 170 puntos de
venda.