Vodafone abre o seu servizo de atención por WhatsApp a todos os clientes
luns, 21 de marzo do 2022
Vodafone
España anunciou este luns 21 de marzo que xa está operativo e
dispoñíbel o servizo de atención para todos os seus clientes a
través da aplicación WhatsApp. Trátase dunha opción de balde,
sen esperas, “con atención 24 x 7 todos os días do ano” e,
segundo engade a operadora, “cen por cen libre de publicidade”.
Os clientes que desexen facer uso desta nova canle
de atención terán que engadir o número 607 100 100 á súa axenda
de contactos e iniciar unha conversación a través da súa conta de
WhatsApp. A operadora lembra que o servizo leva máis “dun ano
dispoñíbel” para os clientes prepago da compañía, “con
excelentes datos de funcionamento até a data”, grazas sobre todo
ao potente motor de Linguaxe Natural (baseado en Intelixencia
Artificial). O resultado son “uns valores excepcionalmente altos de
recomendación do servizo e autoxestión, soportando máis de 14.000
contactos semanais”, explica Vodafone, engadindo que agora ábrese
a canle a todos os clientes, tanto aos de prepago como de contrato. A
idea é facilitarlles os pasos para realizar múltiples consultas e
poder resolver dúbidas e problemas sobre facturas, consumo, avarías,
tarifas ou información sobre novos produtos e servizos, entre
outras.
Con este lanzamento, Vodafone quere reforzar a súa
aposta pola dixitalización de todos os seus procesos, sendo a
aplicación Mi Vodafone o principal punto de contacto dos seus
clientes, con máis de 100 millóns de visitas e unha penetración do
70%.