Vodafone lánzase a publicitar a súa marca de baixo custe, a operadora Lowi
xoves, 8 de xaneiro do 2015
Vodafone vén de
estrearse no eido da telefonía para todos os petos co seu operador
móbil virtual Lowi. A intención
da operadora é non descoidar un ámbito de actividade (o chamado
ámbito low cost da telefonía) no que xa están concorrendo
algúns dos seus principais competidores, como por exemplo
Telefónica. Vodafone, que puxo en marcha estes días a estratexia
publicitara de Lowi nas canles de televisión (podemos
vela tamén en YouTube), presenta o seu operador móbil virtual
“como a mellor alternativa para quen queira falar e navegar por
pouco diñeiro”. Segundo informa, estamos ante “unha marca low
cost de comunicacións que xorde co compromiso de ofrecer
servizos dunha maneira sinxela, transparente e disruptiva”.
Máis en detalle, a liña
de baixo custe de Vodafone opera sobre a súa rede 3G cunha oferta de
partida de 1 Gbyte de datos e chamadas a todos os destinos nacionais
a cero céntimos o minuto por seis euros ao mes. Polo que respecta á
campaña publicitaria que xa está en marcha, foi desenvolvida pola
axencia Sra. Rushmore, firma titular da conta de Vodafone,
encargándose as firmas Wink e Ymedia da xestión de medios.
Por
certo que a presentación oficial de Lowi levouse a cabo, como
lembraremos, o pasado mes de decembro. Na posta en longo, a
compañía fixo saber que o seu obxectivo, amais de competir coas
operadoras rivais, é marcar diferencias con elas en materia de
estratexia comercial. Para comezar, funcionará de xeito
independente, contará co seu propio centro de atención ao cliente
e, respecto da oferta de lanzamento devandita (seis euros ao mes),
permitirá ao clientes amorear os datos que non tiveran consumido
durante as catro semanas previas. Outra das particularidades de Lowi
é que reducirá a velocidade aos clientes que vaian alén da
franquía de datos no canto de cobrarlles.