Xa podemos presentar candidaturas á terceira edición de Vodafone Connecting for Good Galicia
luns, 7 de maio do 2018
Xa
está en marcha a terceira edición de Vodafone Connecting for Good
Galicia, a iniciativa de Vodafone, AMTEGA e Economía para impulsar e
acelerar proxectos tecnolóxico-sociais con vontade de mellorar a
calidade de vida dunha manchea de colectivos. Segundo
vén de informar a axencia que dirixe mar Pereira, as/os
emprendedoras/es que queiran concorrer na terceira entrega do
programa, xa poden presentar as súas candidaturas, até o 31 de
xullo.
Poderán
solicitar a súa participación todas aquelas empresas e
emprendedores maiores de 18 anos que, desde Galicia, conten “cun
modelo de negocio innovador e claras vantaxes competitivas para un
produto ou servizo que resolva algún reto social no ámbito da
educación, saúde, participación cidadá, ou en calquera dos
recollidos na Axenda Dixital de Galicia 2020”, segundo se sinala
nas bases.
Nelas
explícase que “valorarase especialmente” o enfoque inclusivo á
hora de ter en conta a persoas con diversidades funcionais, motrices
ou cognitivas e persoas maiores. O obxectivo do programa é
“conseguir que estas iniciativas empresariais convértanse en
negocios reais e os seus produtos ou servizos despeguen coas maiores
garantías de éxito”,
Nesta
convocatoria, coma nas edicións previas, seleccionaranse un máximo
de seis iniciativas de emprendemento, que contarán cun patrocinio de
2.000 euros cada unha, concedido pola Xunta, así como de axudas,
outorgadas por Fundación Vodafone, para a contratación de persoas
con discapacidade para o desenvolvemento das súas respectivas ideas
de negocio. Doutra banda, tamén poderán optar á concesión dunha
axuda de 25.000 euros da Xunta de Galicia ao mellor proxecto para a
súa execución e posta en marcha. Ademais, Fundación Vodafone
outorgará o Premio Conectados pola Accesibilidade de 10.000 euros,
ao proxecto que mellor incorporase os principios de accesibilidade
universal.
Os
proxectos incorporados ao programa beneficiaranse de sesións de
formación e asesoramento e accederán a un conxunto de ferramentas e
recursos a través “dun traballo personalizado” e “dunha
metodoloxía de aceleración específica baseada na innovación”.
Todas as iniciativas disporán dun espazo de traballo na sede de
Vodafone Connecting for Good, situada nas dependencias do Centro de
Emprendemento da Cidade da Cultura, para “facilitar a coordinación
e xestión das propostas”.
O
fallo do Xurado cos proxectos seleccionados notificarase antes do 1
de outubro. A fase de formación dos participantes terá unha
duración de seis meses, desde o 15 de outubro de 2018 até o 15 de
abril de 2019.
Para
a valoración dos proxectos, os responsábeis dos mesmos deberán
rexistrar a candidatura na web específica da fundación,
www.fundacionvodafone.es/premios.
Unha vez finalizado o prazo de presentación de solicitudes, comezará
o proceso de selección dos participantes que constará de tres
fases.