Xa podemos solicitar as axudas á contratación e á dixitalización da Deputación da Coruña
xoves, 21 de marzo do 2019
Este
xoves ábrese o prazo de solicitudes para as axudas da Deputación da
Coruña en materia de dixitalización e crecemento das PEME,
microempresas e autónomos da provincia. Trátase da convocatoria
2019 da liña de apoios empresariais do Plan
de Emprego Local (PEL) da entidade que preside Valentín
González, cuxo prazo ficará aberto até o 22 de abril ás 14.00
horas. Segundo
explicou onte o propio titular do Goberno provincial, o obxectivo
é “contribuír á consolidación e fortalecemento do tecido
empresarial”, incentivando a creación de emprego e o financiamento
de investimentos e actividades. Entre os investimentos que merecen
especial atención figuran todos aqueles elementos que contribúan á
innovación e á dixitalización.
González
Formoso salientou que se trata do terceiro ano que se convocan estas
liñas de axudas, que en 2019 suporán un investimento de 5.260.000
euros, dos que 3 millóns se destinan a subvencionar a contratación
de traballadores/as e 2,26 millóns a financiar novos investimentos
en actividades en empresas de recente creación.
PEL-PEME
A
liña PEL-PEME subvencionará ás empresas situadas nos concellos de
menos de 20.000 habitantes da provincia da Coruña para a
contratación laboral dunha persoa en situación de desemprego
durante un período de 12 meses. A Deputación financiará o 75% do
soldo e a Seguridade Social do/a traballador/a contratado/a, ata un
máximo de 16.500 euros anuais.
Amais,
habilítase tamén unha liña PEL-PEME Mantemento, que subvencionará
as contratacións laborais indefinidas das entidades subvencionadas
na convocatoria anterior do programa.
PEL-Emprende
Na
liña PEL-Emprende Investimento a Deputación da Coruña financiará
o desenvolvemento de investimentos en bens inventariábeis “novos e
necesarios para o desenvolvemento da actividade en empresas cunha
antigüidade máxima de 5 anos”. As axudas cubrirán ata o 80% do
investimento, cun máximo de 20.000 euros de axuda a fondo perdido,
para a compra de aplicacións informáticas, maquinaria, útiles,
mobiliario e equipos para procesos de información.
Na
liña PEL-Emprende Actividades contémplanse axudas para subvencionar
as actividades e/ou actuacións no desenvolvemento da iniciativa
empresarial nos ámbitos de Responsabilidade Social Empresarial, a
mercadotecnia (o marketing), a comunicación, a
competitividade e a expansión en empresas cunha antigüidade máxima
de 10 anos. As axudas cubrirán ata o 80% do orzamento da actividade,
cun máximo de 4.800 euros.
1
millón de euros a maiores
A
Deputación da Coruña quixo certificar este ano a súa aposta pola
creación de emprego aumentando o orzamento nestas liñas en
1.000.000 de euros respecto á convocatoria de 2018, polo que agarda
que “teña tan boa acollida polas empresas do territorio
provincial”. Na convocatoria de 2018 foron recibidas un total de
2.260 solicitudes. A entidade que preside Valentín González
salienta tamén que se segue a valorar con maior puntuación a
presenza feminina e a de persoas con diversidade funcional na
participación do capital das empresas..