Xove súmase aos concellos que xa xestionan incidencias coa axuda dunha aplicación de eLaboro
martes, 29 de abril do 2014
O Concello de Xove e a
empresa galega eLaboro
presentaron hoxe unha innovadora ferramenta dirixida a optimizar a
xestión de incidencias do municipio da Mariña de Lugo. A cita cos
medios veu da man do alcalde, José Demetrio Salgueiro, e máis o
director executivo de eLaboro, Jesús Velasco. A ferramenta en
cuestión, City4xove, é un recurso inserido no que comunmente se
coñece como eAdministración ou Cidades Intelixentes. Ou sexa, nese
tipo de ferramentas e servizos que melloran a comunicación das
institucións coa veciñanza, ao tempo que axilizan os trámites e
operacións e abren marxe para a participación da xente na vida
pública. No caso de City4xove, do que se trata é de achegar “aos
veciños un novo vieiro de interacción co concello”, sinalouse na
presentación.
Este desenvolveuse no
Centro Cívico local, e a eles asistiron representantes de diversos
colectivos sociais de Xove, amais de Salgueiro e Velasco, que
explicaron “as múltiples vantaxes que vai representar esta
ferramenta tecnolóxica a prol da notificación de avisos por parte
da poboación”. A aplicación está xa dispoñíbel para a súa
descarga gratuíta en
Google Play, para plataformas Android. Segundo se fixo saber na
cita cos medios e coa veciñanza, a principal función de City4xove é
a de pór nas mans dos veciños “unha ferramenta coa que informar
en calquera momento e lugar de incidencias detectadas en mobiliario
ou espazos que dependen do concello: alumeado, recollida do lixo,
rede de sumidoiros, instalacións municipais, etc”. Estas
notificacións, a través deste servizo, serán fornecidas aos
profesionais responsábeis de cada área, “incluíndo as firmas
concesionarias, que poderán facer un seguimento constante da xestión
das incidencias, desde que se coñece ata que se resolve”.
No que atinxe ao papel
que desenvolve o cidadán, amais de achegar a notificación, no acto
fíxose saber que tamén constancia da recepción do seu aviso e,
igualmente, do arranxo do problema. Isto farase a través de mensaxes
no dispositivo dende o que enviou a notificación.
Segundo se explicou, a
ferramenta é unha ferramenta a tempo completo. Deste xeito, “a
posta en marcha de City4xove garantirá a resposta dos servizos
municipais ante as incidencias rexistradas os 365 días do ano, xa
que nas xornadas non laborables, o sistema derivará as notificacións
aos vixiantes, que actuarán de inmediato no caso de que se precise
unha reparación urxente”.
Coa posta en marcha en
Xove deste servizo, xa son máis de 20 os concellos que arestora
dispoñen da aplicación, entre os que se contan Barreiros, O Grove,
Arzúa ou Rianxo, entre outros. Segundo fai saber eLaboro, “a
ferramenta está a ser implantada con éxito na xeografía galega,
grazas á súa capacidade de adaptación ás necesidades de cada
localidade e á mellora que representa na xestión municipal e no
obxectivo de achegarlle o Goberno local ao cidadán”. En
definitiva, engade a firma galega, “trátase de potenciar as
posibilidades das cidades intelixentes en concellos pequenos e con
poboación dispersa, onde as novas tecnoloxías están a converterse
en instrumentos básicos na comunicación e o acceso dos veciños aos
servizos municipais”.