iLoveSciencie fai posíbel o primeiro proxecto de I+D sanitaria española impulsado polos internautas
martes, 18 de febreiro do 2014
O galego Roi Villar,
responsábel de comunicación de iLoveScience,
a plataforma
de financiamento colectiva para proxectos científicos de cuxa posta
en marcha falamos os días pasados dende Código Cero, vén de
informar dun importante fito no eido da investigación científica
apoiada e auspiciada por pequenos axentes de financiamento (neste
caso internautas á par que membros da comunidade iLoveScience).
Segundo nos conta, “nas últimas horas fomos quen de acadar apoio
orzamentario para o noso proxecto de investigación no diagnóstico
do alzheimer, converténdose este no primeiro proxecto español de
investigación sanitaria impulsado de xeito exclusivo a partir das
achegas dos internautas”. O devandito fito, polo tanto, é a
constatación definitiva de que outro xeito de facer ciencia é
posíbel, a contrapelo dos cartos dos gobernos e as administracións.
Un xeito de facer ciencia que se apoia no cidadán, e non nos
políticos.
O proxecto de loita
contra o alzheimer que obtivo financiamento vén da man de
Rodrigo Barderas, mozo investigador da Universidade Complutense de
Madrid. A súa iniciativa, o primeiro proxecto español de
biomedicina financiado a través de Internet, requiriu algo máis dun
mes na Rede para obter os orzamentos que precisaba. En total foron 25
cidadáns particulares os que realizaron pequenas achegas económicas
para conseguir reunir os 1.000 euros que se precisaban. Barderas
acadou todo o diñeiro a través da plataforma de crowdfunding
iLoveScience, onde puido expor e debater o seu proxecto, conseguindo
finalmente a confianza e apoio dos devanditos 25 lovers.
Mentres, outros dous proxectos seguen a realizar esforzos por atraer
á poboación na loita contra o cancro de mama e a sepse
hospitalaria.
“Unha vez recadada a
cantidade monetaria fixada”, cóntanos Roi, “comezarase cos
experimentos que Rodrigo propuxera na páxina web”. Máis polo
miúdo, a partir de miúdos dispositivos cubertos con máis de 1.500
proteínas, peneirará mostras de soro sanguíneo de persoas
afectadas polo alzheimer. Grazas a este traballo, Rodrigo buscará
moléculas que se atopen exclusivamente no soro sanguíneo de
pacientes afectados. Combinando estes datos, a presenza das
devanditas moléculas permitiría “identificar a aqueles doentes
que non presentan síntomas pero sofren a enfermidade”. Esta pegada
que deixa a doenza no sangue do paciente constitúe o que se coñece
como sinatura molecular da enfermidade. Nunha fase posterior da súa
investigación, Rodrigo comprobará a validez destas sinaturas
moleculares entre suxeitos enfermos e sans, nun maior número de
pacientes.