A galega Torus Software, Premio Nacional Emprendedor XXI
martes, 9 de decembro do 2014
Novamente, e xa van
moitos, temos que falar dun recoñecemento para a empresa galega
Torus Software Solutions, unha
nova distinción que pon de relevo a súa capacidade innovadora e o
seu potencial de proxección en múltiples mercados. E o de
“novamente” vén a conto porque, como lembraremos, Torus obtivo
recentemente galardóns
do CPEIG (Premio á Mellor Iniciativa Emprendedora) ou da
AETG-COETG (Premio Gerardo García Campos). Ademais, a todo isto
hai que engadir que en xuño soubemos que La
Caixa decidiu outorgarlle o seu Premio EmprendedorXXI en Galicia,
convocatoria 2014. Precisamente, o pasado venres a
empresa galega recibiu este último galardón, na súa edición
estatal, de mans da devandita entidade financeira e a Consellería de
Economía, colaboradora do certame a través do IGAPE.
Por certo que na
entrega do devandito galardón, o propio conselleiro de Economía,
Francisco Conde, felicitou en persoa aos responsábeis da compañía
coruñesa “pola obtención dun recoñecemento que premia tanto o
seu labor innovador como o potencial de crecemento”.
Como dixemos, Torus
Software Solutions recibira o pasado 5 de xuño o premio Emprendedor
XXI a nivel galego, fase organizada por La Caixa en colaboración coa
propia Consellería de Economía e Industria, nun acto desenvolvido
na Coruña que contou coa participación do director do IGAPE, Javier
Aguilera.
Lembrar que a empresa
distinguida desenvolve e comercializa arestora un novo protocolo de
comunicacións substitutivo do clásico protocolo de Internet (IP),
co obxectivo de aumentar a capacidade de procesamento e acelerar o
funcionamento das aplicacións informáticas, diminuíndo os seus
tempos de resposta.
No acto do pasado
venres, esta spin off nacida na Universidade da Coruña obtivo
tamén o premio especial á Innovación concedido pola Embaixada de
Israel para distinguir, entre todos os finalistas das diferentes
autonomías, o proxecto máis destacado neste ámbito.
Promovidos por La
Caixa, os premios Emprendedor XXI distinguen cada ano os proxectos
innovadores máis destacados, que teñen a oportunidade de acceder a
formación especializada e financiamento.