Arrinca o 2º programa de emprendemento de SmartPEME con oito mulleres innovadoras
martes, 25 de abril do 2023
Oito
mulleres de Pontevedra, Salvaterra, Sanxenxo, Vigo e Vilagarcía de
Arousa están a participar xa na segunda edición do Programa de
Emprendemento de SmartPEME (programa de capacitación tecnolóxica da
Deputación de Pontevedra) no Viveiro de Empresas situado no Polígono
de Barro. A
presidenta da Deputación, Carmela Silva, acompañada do alcalde de
Barro, Xosé Manuel Abraldes, visitou este martes 25 de abril as
instalacións para coñecer de primeira man os proxectos das oito
emprendedoras, que están a recibir (durante tres meses), formación
e asesoramento por parte do equipo profesional de SmartPEME.
Os
contidos, entre outros temas, poñen o foco nas claves para mellorar
a competitividade, manexar as novas tecnoloxías, crear plans de
empresas e de mercadotecnia ou tamén unha identidade corporativa. NA
xornada deste martes tamén participaron nunha sesión de LEGO
Serious Play.
Carmela
Silva puxo en valor o feito de que todos os proxectos estean
liderados por mulleres porque “no ámbito da economía temos moitos
pasos que dar, e temos que seguir sendo moitas máis mulleres para
poder chegar á metade, xa que eles aínda son moitos máis” malia
que “as mulleres sexamos máis do 60% das persoas tituladas
universitarias e, polo tanto, a maioría do talento”.
O
alcalde de Barro, Xosé Manuel Abraldes, deu os parabéns ás
participantes e asegurou que “é un orgullo que teñamos en Barro
este edificio que funciona como núcleo central de apoio ás persoas
emprendedoras, e ademais dentro dun polígono que segue medrando e
enchéndose de actividade económica”.
No
programa participan Sonia Limés, de Pontevedra (coa empresa Alecrín
Atención Temprana), Beatriz Amorín, de Pontevedra (con BAmorin,
proxecto de ioga), Susana Rodríguez, de Salvaterra (co proxecto
Hiar, Artesanía en Estampado Botánico), Patricia Josefina
Hernández, de Pontevedra (coa firma de sobremesas en tarros Dulces
Prodigios), María Agustina Pereira, de Vigo (Gestión Integral de
Subvenciones, empresa que axuda a pemes e persoas autónomas a
impulsar os seus negocios), Ángeles Oubiña, de Vilagarcía (cun
proxecto para elaborar un produto de protección UV), Eloísa Puig,
de Pontevedra (con Musggo Yoga), e Aida Mascato, de Sanxenxo (con
Carmencitas, dedicada á produción de tortas e doces e organización
de eventos).
O
programa conta con dúas fases. Por unha banda, o desenvolvemento de
actividades de capacitación, compostas por distintos obradoiros
enfocados á creación dun plan de empresa, mercadotecnia dixital,
web, desenvolvemento de habilidades empresariais ou finanzas. Estas
sesións, dinámicas e innovadoras, buscan potenciar os proxectos e
favorecer tanto a colaboración como a creación de sinerxías co
resto de persoas participantes. A segunda fase será a de mentoring,
que constará de sesións de traballo individualizadas con persoas
asesoras expertas en emprendemento, novas tecnoloxías e imaxe
dixital (todas elas adaptadas ás necesidades de cada proxecto). O
itinerario suma un total de 60 horas de actividades presenciais e
virtuais, segundo as necesidades das persoas participantes. As
presenciais desenvólvense no Centro Provincial de Economía Dixital
de SmartPEME no Viveiro de Empresas de Barro, para colaborar no
fomento do emprendemento rural e favorecer a creación dunha economía
social e sustentábel.